樓市出更：爾巒特色戶 價戰新高

元朗樓市發展一日千里，區內大地主新地（00016）不斷開拓各類物業市場，佢哋喺區內最新豪宅新盤爾巒，最快下周開價同月底前開售，首批約50伙包括洋房、特色單位仲有五房大宅，其中爾巒至尊五房單位平均意向呎價1.5萬元，勢創區內標準單位新高。另同系區內大型綜合發展項目YOHO系列正申請再度擴大版圖，仲首度加入酒店設施，提供約356個房間。

事實上，新地近年密密手喺元朗賣樓同增加土儲，今年第一擊係早前開售嘅RESIDENCE譽88，銷情相當理想，話口未完又正密鑼緊鼓部署開售爾巒。

六萬呎售樓處 4億打造

新地副董事總經理雷霆（雷樓神）尋日親自帶領劉Sir優先參觀該盤示範單位，據雷樓神講，呢個售樓處佔地6萬方呎，不惜工本用咗超過4億元打造，處處洋溢意大利風情。

雷樓神又話，爾巒首批會推約50伙，除咗洋房同特色單位之外，仲會推出標準單位中最大面積嘅爾巒至尊五房巨宅，呢類單位建築面積近1,700方呎，平均意向呎價1.5萬元，而示範單位料下周起正式開放。

另新地代理執行董事周國賢向劉Sir證實，向城規會申請喺YOHO MIDTOWN嗰邊加建酒店，佢話可以配合YOHO大型綜合發展，而樓面約100萬方呎嘅YOHO Mall商場將會係新界北具指標嘅大型商場，加入酒店設施會令成個項目更完善，方便遊客及購物人士。

睇番城規會文件，新地今次申請面積接近40萬方呎，範圍涵蓋YOHO MIDTOWN及毗鄰西面一幅政府地，申請分咗五部分，除咗I期係已入伙嘅YOHO MIDTOWN現址外，其餘期數都係新增樓宇發展申請。

MIDTOWN旁建37層酒店

其中屋苑以西嘅IIa期同埋隔籬一塊政府用地，將發展1幢37層高酒店及1幢8層高教育機構等建築物，酒店房加埋有約356間。至於IIb期同埋III期係住宅發展，計劃興建3幢30幾層高分層住宅，加埋約604個單位。