股海實戰：國壽有力上試25元

上周五港股無情情抽高，但成交未見突出，問卜架升市原因，個個都啞口，話二月份出口數據勝預期，但A股當日低收，本地魚缸又冇咩特別消息，最終結論歸因於美股不斷走高，上周五日本股市亦高收，班淡友擔心一旦A股真係爆升，咁月底基金季結可能會被挾爆倉，所以選擇平倉，冚倉盤帶動下嘅升市，唔需要有太多理由。

上周四阿莊買入嘅京能潔能（00579）由當日低位1.84元，升至全日高位2.2元收市，升幅18%，成交7.18億元，好在趕得切搭上順風車。睇成交呢隻股非同小可，若然短線回吐守穩2元關，會再睇位加注。

鐵路股有危亦有機

國務院機構將進行大改革，其中鐵道部將不獲保留，日後將由交通運輸部統籌規劃鐵路公路民航等發展。阿莊認為，新政大方向係為市場引入更多競爭，以全面提升生產及服務水平，而日後規劃鐵道發展，將綜合全國陸、空運輸能力全面考慮，以完善整體配套，避免重複低效建設，另涉及鐵路產業鏈除咗鐵路系統機車等等之外，還包括旅遊、酒店、餐飲、醫藥等多個範疇，相信最終會剝離鐵路體系，各自納入本行商業營運。相關政策對幾隻鐵路相關股份嘅影響「亦危亦機」，一方面冇得再靠食老本坐定定等訂單，另一方面須充分掌握上市融資平台優勢，做好本業，捕捉鐵路周邊行業商業化運營嘅投資機會，鞏固領導地位。

展望本周市況，如今歐、美股市氣氛向好，論港股外圍因素，升市如今只欠A股開車嘅東風，近日傳來喺內地居住港澳台人士可直接買A股，市場估計下一步更會嘗試開放予非內地居住港澳台人士，咁搞法即係逐步推進A股直通車，而為平衡供需關係，IPO市場亦有望重啟。雖則話開放初期誘發嘅投資A股金額未必太多，但對A股市場開放意義重大，短期可以(目及)實A股概念股嘅反應。

講到A股概念股，上周五國壽（02628）收報23.3元，乃自一月下旬以來首次重上10日線樓上收市，且14日RSI已扭轉跌勢，回升至43。國壽喺二月底發出盈警，預計去年度淨利潤按年跌40%左右，以一一年賺183億（人民幣．下同）計算，即係話去年度純利約109.8億。以國壽去年首九個月賺74.2億計，即係話末季賺約35億元，較去年第三季蝕22億有所改善，難怪見到盈警公布過後，股價反而喺低位見承接。睇走勢，短線若能以大成交抽穿23.5元（港元．下同），是浪反彈有機會上試50日線25元水平，支持位可參考上周初低位22.35元。