樓市出更：莊士敦道鋪「吉」得有道理

向來好旺嘅灣仔莊士敦道，過去半年近修頓遊樂場嘅一段街道，竟然出現約4個吉舖，劉Sir十幾年都未見過。有代理老友話，由於有業主睇好區內即將開售嘅信置（00083）利東街住宅重建項目「囍滙」，會帶動零售氣氛變天，所以寧願暫時將個舖交吉，物色新租客；好似面積最大，原由酒家租用嘅地舖，業主紀惠集團將個舖劏成5個地舖重新招租。

灣仔呢幾年有好多新盤陸續落成，吸引唔少高消費力住客。聽講信置嘅囍滙會喺上半年推售，提供單位約1,300伙，仲會有特色商業樓面，大家都睇好會帶動呢區消費前景。

明記原址 紀惠拆5舖

有區內代理話，依家莊士敦道近修頓遊樂場一段，街舖數目約莫60間，吉舖有4間，估計部分地舖業主睇好後市唔憂租，暫時將個舖交吉，重新部署。其中紀惠集團嘅莊士敦道35至45號地下部分，面積共約4,000方呎，原本由明記海鮮飯店租用逾二十年，今年農曆新年前宣布結業。

該集團行政總裁湯文亮同劉Sir講，上址原本月租約二十多萬元，本提出新月租約30多萬元續租，不過佢最終無續租，依家分間成5個地舖，其中兩個舖已傾到七七八八，準租戶包括經營酒吧及傢俬，如果5個舖都租晒，月租共約60萬元，較前租有約兩倍增幅。

另一投資者嘅莊士敦道44至46號地下兩地舖，面積共約2,000方呎，原本尹記集團（體育用品店）租用咗約六年，舊年中交吉到依家，代理話，上址原本月租約16萬元，上月售1.58億元，市值月租料約50萬元，租金升幅超過兩倍。

另有外國連鎖品牌率先進駐，其中莊士敦道51至53號地下及地庫，面積約3,760方呎，原由遊戲機中心租用約二十年，舊年中畀國際體育用品店彪馬（PUMA）租咗，聽講月租差唔多17萬元。美國服裝品牌Tommy Bahama 舊年中亦租用莊士敦道60號嘉薈軒地下，面積約5,800方呎，估計新月租約80萬元。

灣仔街坊舖 商戶驚加租

喺灣仔做嘢嘅葉先生認為，「依家灣仔莊士敦道地舖商戶賣嘅嘢，好多都係針對港人為主，相信地舖業主加租嗰陣，相對較克制，不至於逼走老舖。」另喺該條街賣港式涼茶嘅負責人話，「莊士敦道街舖商戶大多做街坊生意，若業主狂加租，連份糧都賺唔到。」