股海實戰:海通國際 供得有理

港股尋日交投轉靜,恒指一度跌逾百點,但尾市跌幅收窄,收報22,771點,僅微跌6點,成交642億元。大市調整期間成交縮減唔係壞事,之但係恒指愈長時間受制於23,000點關,月底前回升至高位做季結嘅機會就愈低。為今之計係做跟風者,邊瓣開車就即日鮮跟炒,盡量控制持倉風險。

不過,有基金經理同阿莊講,今年新能源同環保概念股長炒長有,着筆者持倉撥出一定比例中長線持有相關優質股,回報好過日日炒出炒入咁話。本來阿莊都有啲猶豫,但想起呢位人兄之前推介過嘅頁岩氣股同興業太陽能(00750),又唔敢唔信。周二本欄提及嘅京能潔能(00579)抖咗兩日氣,阿莊話1.9元樓下會睇位上車,尋日遂以均價1.85元買入15萬股,博佢旗形突破,踢穿2元關,另已按計劃沽出3萬股天津發展(00882),均價6.96元。

近日券商股海通國際(00665)公布去年度業績,收入增17%至11.77億元;純利增92%至2.93億元,每股盈利32.06仙,NAV每股3.55元,表現唔錯,增長主要來自配售、包銷及分包銷佣金,以及向企業融資戶提供借貸業務,年內該兩大業務收入分別錄得3.9倍及57%增長。

同一時間,海通宣布二供一,每股供2.55元,集資約11億元,用作孖展及結構性融資、固定收益及包銷業務嘅資金需要。對於傳來供股消息,阿莊唔太意外,皆因見到截至去年底,其手頭現金及等值由前年底嘅10億元降至4.67億元,為應付未來業務發展嘅資金需要,公司提出供股建議,讓全體股東有機會參與公司增資擴股活動,照計亦無可厚非。

消化過後見真章

今次供股母公司乃包銷商之一,因包銷供股持股量最多將增至75%,係咪為日後適時提出私有化鋪路,實在唔出奇,但小股東都係自己計自己數,反正依家全體股東均有權按較NAV折讓28%加注,唔參與會被攤薄權益。尋日海通股價跌6.7%,收報3.9元,相信係供股消息來得較突然,惟料消化過後,股價自會見真章。

綜觀嚟緊兩地券商行業前途可予憧憬,公司本身交得出成績表,現價估值亦唔算貴,小股東唔難搵到加注理由。尋日其股價跌穿了50日線,受市場氣氛影響,短線尚有餘震亦唔奇,但相信3.5元水平具支持,真係見到呢啲位,都心郁郁想買啲嚟供!

阿莊

中港兩地券商行業前景樂觀,有母公司作後盾的海通國際,值得憧憬。(資料圖片)