樓市出更：大屋苑租務 有排旺

今年初樓市升勢強勁，唔少追唔切樓價升勢嘅市民，已疊埋心水租樓。踏入蛇年，政府隨即將樓市措施加辣，令好多準買家入市態度虛怯，寧願轉軚租樓，令到50個指標屋苑，上個月租務比例高見63%，係繼舊年六月之後嘅新高，平均呎租亦進一步推升1.4%，去到25.47元，形成連升十三個月旺勢。

利嘉閣研究部主管周滿傑同劉Sir講，上個月政府突然加辣遏抑樓市，買家入市態度虛怯，當中唔少更選擇轉買為租，令到租務成交比例，由一月份嘅只係佔40%，一下子升至上月嘅63%，預期未來兩、三個月內，中小型住宅租務成交勢將繼續飆升，租金亦可望受惠再升3至5%。

爵悅庭租務急增倍半

根據該公司數據，二月份50個指標屋苑錄到752宗租務成交，按月減少11%，租務成交量仲係○五年以後單月新低，不過，同期買賣成交表現仲差，所以租務比例反而升到63%，創近八個月新高。

當中有超過三成屋苑租務交投逆市做好，荃灣爵悅庭上個月錄到5宗租務成交，對比一月份只得2宗，足足升咗150%。而鴨脷洲海怡半島同將軍澳中心，升幅都有100%，分別錄到42宗同24宗。至於鰂魚涌太古城更加錄到多達65宗租務個案。

中半山譽皇居13.5萬承租

踏入三月份，租務旺勢未減，美聯林潤強話，海怡半島19座中層E室，建築/實用面積約785/632方呎，望內園景，啱啱由外區租客以每月約1.9萬元承租，建築/實用呎租約24.2/30元。

除咗大型屋苑，中大價單位租務表現都幾好。美聯劉敏嫻表示，中半山譽皇居高層A室，最近以月租約13.5萬元租出，建築/實用面積約3,020/2,119方呎，建築/實用呎租約44.7/63.7元。

聽中原鄧穎堅講，大埔比華利山別墅今月已錄約3宗租務成交，其中3期富匯半島翠樺道單號屋，由廠家以每月5萬元承租，建築/實用呎租14.5/24.4元。