魚缸Blogger：廣藥 博踢上23元

尋日隻醫護股廣州藥業（00874）逆市強勢，配合兩會召開兼佳績推多一把，尋日即市創出21.6元的五十二周新高，並以近全日高位21.55元收市，升幅13.4%，短線回調若唔跌穿20元，博佢踢上23蚊。

廣藥啱啱派成績表，去年營業收入增長51.2%至82.29億元人仔，淨利潤增長37.4%至3.95億元人仔，但銷售費用則急升九成至13.59億元人仔。因公司去年通過訴訟拎番「王老吉」經營權，其後同「加多寶」進入拉鋸戰，為咗爭奪涼茶市場佔有率，開支自然有番咁上下，可以體諒。至於母公司廣藥集團，係內地最大中成藥生產基地及抗感染類製劑生產商之一，城鎮化帶動醫療需求，加上廣藥同白雲山合併將可發揮協同效應，公司自然好景。

廣州藥業（00874）

阻力位：23元

支持位：18元