Fundman睇市：領匯 有買貴無買錯

繼新加坡七次出招，以及香港特區政府於四個多月內，三次變陣以趕絕樓市投機客後，中央亦終於推出「新國五條」，誓要樓市狂牛唔能夠繼續肆無忌憚。

尋日所見，內房股跌得幾誇張，過去兩個月「跌得少」的中海（00688）及華潤置地（01109）一鋪追番晒，急瀉7%和9%，反而高位跌得多的雅居樂（03383）及龍湖（00960）僅跌4至5%，後者尾市仲有唔少買盤撈底，愈跌愈少，唔排除有大孖沙趁壞消息出盡博反彈。

港股跌勢一面倒

尋日滬深股市畀新國五條炸散，雙雙跌超過3巴仙，港股無運行，恒指跌342點，收報22,537點，升跌比例顯示，四隻股票，三隻見紅，頗一面倒，即月期指收22,468點，低水70點，撇除藍籌月內除息實際僅屬平水，淡友會唔會即刻攻破上星期恒指低位22,445點？看收市後滙控（00005）稍差過預期的業績，加上近年幾乎鋪鋪業績後翌日都要裂口向下的往績，睇怕係危危哋。

睇番滙控業績，純利跌16.5%，至140億美元，較意外是提高派息，第四季派18美仙，高於去年同期的14美仙，令全年派息45美仙比去年多一成，管理層亦預告今年首三季派息會上調11%至10美仙，對於買滙控來收息的，當然高興，對於較進取，希望保留較多現金進行併購的投資者，可能反映滙控心目中未有短期目標。

今年港股第一個交易日勁升655點，頭威頭勢，但未到三月中就跌凸，相當反高潮，近期當的炒新能源、太陽能、風電股，老實講，史提芬無乜心水，個市行三步退兩步，最怕一推介翌日即刻回吐。咁嘅市況，反而令人回想防守股的可愛，一直認定有買貴無買錯的領匯（00823），僅較二月做出上市新高43.4元低4.8%，跌幅比地產股溫和。

事實近期數據顯示內地經濟復甦動力又有減慢迹象，基金轉採較防守性部署實屬必然，記得去年上半年國策傾斜的燃氣，以及周期性復甦的內房及本地地產股通通跑贏大市，現時燃氣股已太貴，內房可以博反彈，但唔係穩陣之選，特區政府又唔想人炒樓，出招浪接浪，這或會推更多資金湧入商舖物業，以收租為本的房地產基金，斷估唔會衰得去邊。