樓市出更：天台廣告位 夠買兩層樓

新辣招下工商舖物業依然係私人拍賣場焦點。灣仔區就有一個大型天台廣告位置，以高達1,630萬元推出拍賣，回報有4厘，呢個價錢可買港島太古城兩個細單位。不過，港島南貝沙灣再有兩批共24個電單車位推出拍賣，平均開價低見1.33萬元，相信係呢類物業歷來拍賣最平開價，未知係咪因為新辣招，所以賣平啲。

雖然政府新辣招冷卻工商舖市場，不過劉Sir發現，唔少呢類非住宅工商舖物業嘅業主對後市仍然信心十足。

貝沙電單車位減價推出

好似摩理臣山道天樂廣場天台一個廣告位置，即將透過私人拍賣行推出拍賣，連約開價高達1,630萬元，都咪話唔巴閉。

代理老友謝小姐話，呢個廣告位長約40呎、高約13呎、側邊約26呎，由於高踞銅鑼灣同灣仔區一帶，可謂一覽無遺，甚有宣傳價值，依家每月租金都成6萬幾，以今次拍賣開價計，回報率有約4.4厘。

此外，個別發展商近期積極去貨，下周同場推出拍賣嘅貝沙灣兩批電單車位，以綑綁形式分兩批拍賣，開價分別為16萬同18萬元，兩批平均每個1.33萬及1.5萬元，比早前發展商拍賣平均每個售1.77萬同1.82萬元，仲要低逾兩成，相信係歷來拍賣最平開價嘅電單車位。

赤柱大街罕有全幢拍賣

至於銅鑼灣駱克道539號樓上一個住宅，即早前結業嘅利苑粥麵樓上，今次以1,680萬元開價拍賣，實用面積約581方呎，呎價約2.9萬元，估計吸引投資客以樓上舖發展。另南區赤柱大街亦見罕有全幢物業下周推拍，實用面積約990方呎，連約開價2,700萬元。

此外，長實（00001）上個月拆售嘅葵涌雍澄軒酒店房間，成交近日陸續曝光，據土地註冊處資料，該廈40樓03室上月錄臨時買賣合約登記，涉資337.5萬元，緊接數日後上址錄轉名登記。

市場人士話，雖然上址轉讓登記中未有錄得金額，但估計是次登記有機會係「摸貨」個案。