魚缸Blogger：中油燃氣 攻守兼備
周二逆市表現硬淨的中油燃氣（00603）尋日再喺成交急增下升逾半成，以接近全日高位1.5元收市，即市一度挾到去1.51元，創咗五十二周新高，睇勢話唔定可以再破頂，唔大貪先睇1.65元。
業務增長空間仍大
中油燃氣業務包括城市管道燃氣、天然氣汽車加氣站、壓縮天然氣（CNG）、液化天然氣（LNG）以及液化石油氣（LPG）的運輸、配送同分銷等，而比起同業，佢嘅規模較細，贏在業務增長空間仍大。
公司喺月初發盈喜，預期截至去年底止全年溢利將比前年錄得顯著升幅，原因係天然氣及相關產品銷售增加，同埋其他投資收益所致。因兩會就嚟召開，內地天然氣價格改革呼聲再起，氣價有機會喺會後全面上調，對燃氣股的盈利能力同前景均有利。另市場憧憬中央出招推動環保能源，係國家重點扶持項目之一，作為公用事業，板塊嘅抗跌力自然有番咁上下，攻守兼備。
