期指攻略：國期好倉小注值博

港股完全係睇實外圍做人。上星期聯儲局的議息紀錄，市場對有委員提出縮減買債規模，反應極大，隔晚伯老話計落印銀紙的好處比壞處多，美股應聲反彈過百點。

意外的是，昨日港股對比外圍反彈力度弱得多，上周四及周五指數兩日共跌524點，周一反彈37點，周二再插300點，隔晚美股強勢重返13,900點關口，但期指結算日的港股，恒指彈得57點，仲未及周二跌幅兩成。

近兩日各技術指標顯示，大市在低位開始見支持，9日RSI由25反彈到28.5，超賣情況未完全修正，綜觀恒指由23,944點開始調整，留低三個下跌裂口，分別係23,406至23,637點、23,026至23,163點、22,769至22,777點，短期要補回難度極大。不過，向上回補一至兩個裂口的機會未可抹殺，但相對上，今浪國企調整的深度高於藍籌，國指昨日低位11,040點已觸及九月至今升浪的0.618回吐支持11,068點，炒即日鮮，小注國期好倉或更值博。