股海實戰：現代牧業 值得留意

財政預算案對港股無大影響，恒指觸及22,500點水平支持後作出技術性反彈，收報22,577點，升57點，成交681億元。阿莊始終認為，恒指較大嘅支持喺22,000點關，若季內能成功下試該水平支持，將更有利次季反彈。

尋日港股回升，地產股反彈成主要動力，恒生地產指數升1.6%。不過，目前市場仍在消化辣招對樓市嘅影響，相信各大地主要調整今年嘅售樓部署。周一推介過隻中石化（00386），誰知同系嘅儀征（01033）及上海石化（00338）表現更佳，尋日分別升20%及10%，其中上石獲美林唱好，走勢都幾似樣，短線回吐守穩10日線3.13元，應該仲有得去。

兩會概念繼續炒

異動股方面，除咗繼續藉兩會行情炒上嘅新能源板塊之外，呢期魚缸焦點盡在業績股身上。港交所（00388）業績符預期，股價表現靠穩。現代牧業（01117）截至去年底止半年所產牛奶銷售額10.92億元（人民幣．下同），同比增長48.5%；純利增長6.5%至1.7億元。截至去年底，公司喺內地擁有廿二個運營牧場，飼養總共17.6萬頭乳牛，蒙牛（02319）為其主要客戶。

由於蒙牛意欲加強布置上游產能，加上現代牧業上市前與蒙牛及蒙牛嘅高層淵源甚深，故市場一直憧憬，公司有可能成為蒙牛嘅收購對象。截至去年底，現代牧業嘅每股NAV約1.35元（港元．下同），現價市帳率約1.9倍，一一年度往績市盈利則為25倍，論估值中規中矩。近日現代牧業宣布，鄧九強因年齡及健康原因辭任執董，其實自去年辭任董事局主席，鄧氏已向外界表明有意求去，如今再辭任執董，投資界應不感意外，高層變動是否預示公司尚有大變化，就留給投資者猜想。

上月蒙牛曾發通告，否認傳聞中與現代牧業展開任何洽談，但阿莊按牌面分析，現代牧業既然長期供奶予蒙牛，即係奶源質量符合蒙牛嘅要求，提購符合蒙牛拓展上游嘅戰略；二來現代牧業近年正開展下游品牌業務，長遠有機會發展成蒙牛嘅競爭對手，與其要冒着間接養肥「未來敵人」嘅風險，何不及早提購收歸旗下？故站喺行業前景、併購誘因同公司估值，現代牧業都具備留意價值。如股價回試2.1至2.3元水平，可觀察承接力。