樓市出更：核心舖執位 時裝店惡晒

舊年內地豪客嚟香港買少咗高檔消費品，零售旺區地舖商戶組合亦跟住大執位。舊年服裝類商戶喺大部分消費核心區都取代鐘錶珠寶金行，成為大租戶，以租金計，喺尖沙咀廣東道同中區皇后大道中服裝商戶，去年所佔比例都升至54%，其中廣東道飆升34個百分點。至於向來喺中環皇后大道中最勁嘅鐘錶珠寶金飾店，比例由前年嘅60%，大跌至僅佔15%。

劉Sir收到暉煌物業一份店舖報告發現，舊年國際時裝品牌喺中環、尖沙咀及旺角搶舖擴充，以租金計，一一年嗰陣，唔少海外時裝品牌亦都打尖沙咀廣東道主意，舊年呢類商戶佔嗰條街嘅比例去到54%，按年多咗34個百分點，此起彼落下，同街嘅珠寶鐘錶金飾類租戶比例由前年嘅48%，跌到舊年嘅29%。

鞋履商戶激增至30%

服裝類租戶喺皇后大道中嘅街舖租戶比例原先只有32%，舊年就大幅升到去54%，而同服裝相關嘅鞋類及衣物配件商戶，所佔比例亦由前年僅2%，大幅上升至30%。

好似皇后大道中70號卡佛大廈地庫至3樓共5層，面積約5萬方呎，畀國際連鎖時裝店Zara以每月約1,100萬元預租咗，比起H&M租金高1.2倍，係香港歷來單宗商舖租金最高。

至於珠寶鐘錶金飾類租戶响該街道就罕有出現「撤走」情況，去年在該街道所佔比例只達15%，比起前年有成60%，少咗45個百分點。

以前電子產品店爭住喺旺角西洋菜南街插旗租舖，不過，依家唔同晒，電器同埋電訊類商戶佔街舖租戶比例由前年嘅49%，勁插水去到舊年只有嘅22%。而服裝店類商戶比例就由前年嘅只15%，升到舊年嘅31%。

羅素街藥房紛進駐

另外，部分珠寶鐘錶金飾店就變陣搶本地消費市場，喺西洋菜南街加緊開舖，舊年比例增加至19%，比起前年多10個百分點。

而「升呢」成為全球商舖呎租最貴嘅銅鑼灣一線街舖，區內羅素街商戶依然係珠鐘錶金飾店為主，舊年比例都係維持約71%。不過，化妝品店同埋藥房就密密開舖，舊年比例突然間去到21%，而服裝店去年起就幾近絕迹羅素街。

暉煌物業店舖部董事鄺富貴話，內地豪客嚟香港買貴嘢少咗，不過，對高價服裝需求就大增，加上一線街舖供應始終少，對租金會有支持，估計今年銅鑼灣、中環、尖沙咀及旺角一線街舖租金會有5至10%升幅，個別龍頭位租金升幅唔難有15至20%。