股海實戰：國電科環 生意無憂

特區政府等唔到本周財政預算案，上周五收市後宣布打壓樓市炒風新措施。阿莊聽完，有啲擔心新措施唔會令樓價跌，事關更多人唔願意出售物業，市場供應減少，本地用家可能更加難覓居所。另一方面，喺樓市交投萎縮之下，地產代理業亦首當其衝，今日地主股股價受壓在所難免。

恒指上周向下回補咗一月初嘅上升裂口，但見上周五大市成交縮減，且反彈乏力，相信月內下試22,500點水平支持機會大，而實際上較大嘅承接喺22,000點。

中資板塊沽壓明顯

阿莊上周四短炒中傳動（00658）一轉，好在唔貪心，上周五回咗6%。至於話想睇位上車嘅光大國際（00257），未有如期企穩喺5元樓上，所以都係忍手。此外，上周五港股跌市，有幾個中資板塊明顯有沽壓，包括鐵路股同航空股，成交都唔細，似乎係有基金沽貨轉倉，建議投資者別心急撈貨。

上周風電設備股炒咗一轉，短期與節能環保相關嘅概念股，仍有望輪流接力炒上。上周國電科環（01296）遭股東大手減持，涉資兩億多元，但見上周五該股跌幅都算溫和，收報2.59元，跌2.6%，守住配售價2.55元。聽卜架話，批貨冇批散，短線可以密切留意低位承接，或有博反彈機會。

國電科環主要從事研發及產銷風電及太陽能產品，向風電場及太陽能發電廠提供集成服務，亦係燃煤電廠環保及節能方案供應商。今年北京嘅空氣污染情況嚴重，令上大人決心加大力度推動環保節能。國電科環其中一瓣業務正係幫助傳統工業喺環保要求愈來愈高之下改善生產技術，以符合政策要求，例如協助火電行脫硫脫硝、工業煙粉塵控制等等，相信生意無憂。

最近大行對光伏股及風電設備股評價改善，國電科環今年初股價才1.6元左右，現價已翻半番，有舊股東離場唔一定係壞事，最重要係接貨者實力，若然貨源落入強者手，股價整固過後可見真章。本周初會繼續觀望表現再伺機行事，即使受跌市拖累，底線係股價必須守穩2.2至2.3元水平。