樓市出更：宏開道變旺 大租戶霸位

幾年前九龍灣工業區已經有唔少食肆進駐，但大多數係工廠食堂，或者設施好啲嘅港式食店。除此之外，商戶都係以五金同文具舖為主。不過，近年多幢新型商廈及商場落成，嗰區出現好大改變，其中宏開道開咗一線街都有嘅連鎖時裝店及快餐店，反映市場都睇好嗰區零售前景。有代理話，依家宏開道工廈地廠補埋地價做零售，呎租市值可以去到最少60元。

劉Sir知道，依家宏開道地舖同埋地廠數目加埋大約30間，而其中屬連鎖經營嘅時裝，餐飲等零售店數目大約10間，佔成條街大約三成。

連鎖餐廳呎租逾60搶舖

至於喺條街開設分店嘅連鎖MAPLE時裝店，依家全港分店總數達約50間，唔少喺銅鑼灣同尖沙咀等高消費區都有進駐，九龍灣個舖喺宏開道8號地下，估計面積大約2,300方呎，市值月租約14萬元，呎租料約60元，聽講上址曾經由銀行租用。

至於連鎖餐廳麥當勞亦喺條街開咗一間面積約2,400方呎嘅舖位，市場估計市值月租約15萬元，呎租超過60元。

有代理話，依家宏開道唔少已補地價轉做零售等用途嘅地廠，呎租大約60元，較一般地廠呎租高差唔多一倍，相對同區牛頭角道地舖呎租近百元，租金仍有距離，成本開支較低之下，所以能吸引唔少零售店進駐。

商戶睇好後市謀增店

剛喺宏開道開咗第二間天然健康食品嘅周先生表示，「九龍灣有幾個大商場相繼開幕，而最鄰近港鐵九龍灣站同埋德福商場嘅宏開道，更加係必經街道之一，所以唔少大零售租戶都睇好該街零售後市，頻頻進駐，如此情況幾年前根本估唔到，所以已經同拍檔睇緊宏開道有無新舖擴充。」

九龍灣一路都轉變緊，依家區內工業活動已經唔多，所以唔少工業等相關行業舖位都改頭換面，由新租戶頂上，不過，喺區內經營售賣五金及鐵器等生意約二十五年嘅葉先生話，「雖然舖頭面積唔大，只有約1,000方呎，但勝在係大單邊，同埋正對住德福大廈扶手電梯出入口，人流特別多，所以經常都有代理問賣唔賣。不過，上址業主都無理會，暫時可以避過迫遷，不過以後就唔知。」