Fundman睇市：電訊設備股 有睇頭

今年首個交易日，港股因為美國財政懸崖順延三個月，當日恒指爆升655點，報收23,311點，不少股民也因此對今年股市充滿期望。殊不知，一個半月時間貶眼過去，港股成交愈玩愈縮，尋日收市價23,307點，同一月二日收市價只相差4點，個多月後，又再原地踏步。

嚟緊三月初喺美國財政懸崖新死線、以及中國領導人換班，基金經理向來怕這類唔明朗因素，入市態度傾向審慎唔難理解。筆者較傾向相信，現時港股像是一輪衝鋒之後，需要時間消化升幅的整固期。而且，近兩個月美債息由1.6厘回升之後，目前在2厘水平徘徊，但就偏不肯回落，可見基金資產配置未有回到risk off的迹象，短期港股或有溫和調整，但現在蹲下來，只是為未來彈得更高作好準備。

中移（00941）一月份3G上客705.1萬戶，較去年十二月多28.2%，3G用戶總人數達9,497.9萬。按這進度，中移3G用戶過億，應是未來一兩個月內實現之事，要知唔係人人買得起iPhone或三星GSIII，最近就有大行因為內地3G山寨手機需求強勁，開始睇好富士康（02038）。相同概念，其實仲可以留意聯想（00992）、TCL通訊（02618）、瑞聲（02018）及京信通信（02342）。更重要係3G成熟，4G開發之日應不遠矣，押注電訊設備，一定要配埋最能受惠4G投資增加的中興通訊（00763）。

最近流傳兩會前後，中央會再出招調控復燃的內地樓市，內房股調整幅度相當。可是，一月份多間內房公司趁市旺發債及批股，消耗了基金不少購買力，看來要短時間掉轉炒上的條件不足。相比之下，近日受出招傳聞牽連的水泥股，可能更加值博。

水泥股值博吼海螺

春節後水泥需求淡季結束，傳統上三月開始水泥價格每每回升。儘管全國水泥價較去年八月低位已反彈接近五成，但中央近兩年淘汰老舊產能不遺餘力，一三年供應量並無大幅提升的條件。況且，去年底中央大量審批基建項目，以支撐地方經濟，項目工程今年內將陸續展開，有助推動水泥價格及需求向上。

經過去年推介二線水泥股，出現走勢滯後的呆等經驗，決定再守株待兔，趁升浪未開始，睇番兩隻龍頭水泥股海螺（00914）及中國建材（03323）。以往海螺在水泥周期高低潮，主要在1.7至4.1倍市帳率之間上落，現時一三年大約2.3倍唔算貴，尋日早段回吐，最後拗腰以全日高位收市，一於吼番佢。