股海實戰：通達候回吐吸納

前日魚缸好似暴風雨來臨，尋日又突然放晴，A股止跌回穩，恒指反彈逾百點。似乎做淡與維穩兩股力量正在過招，目前恒指主要阻力位仍喺23,500點水平，後市須以大成交突破，始能確認轉穩。

前日本欄推介嘅中傳動（00658）當日回軟，尋日先開車，照計有足夠時間上車，阿莊尋日朝早亦以均價3.5元追入八萬股，高位曾見3.93元，收報3.89元，升16%，成交增至3.56億元，短線若然喺4元關前抖氣，可以先食一轉，等落番3.8元水平又再翻兜，目標再試上月高位4.46元。至於尋日見報推介嘅天津發展（00882）表現亦唔錯，買入三萬股，目標上試6.3至6.5元區域，跌穿5.78元止蝕。

前海概念股見異動

第二次前海建設部際聯席會議今日召開，尋日一眾前海概念股有異動，深圳國際（00152）反彈8%，中集（02039）升3%。此外，前日獲大行唱好嘅富士康（02038），股價未見太大回吐壓力，收報3.34元，升0.9%。講開手機製造商，大行對富士康盈利前景有改善，其中一個原因係睇好白牌手機製造業務前景。

事實上，內地嘅流動通訊網絡覆蓋日益完善，加上城鎮化帶動對流動通訊產品嘅需求，手機市場有望持續增長。講到呢個行業，呢幾日隻通達集團（00698）股價係咁升，尋日更以全日高位0.6元收市，升幅9%。

通達係消費電子產品精密結構件供應商，擁有IML（模內鑲件注塑）技術，應用於手機、手提電腦及電器用品外殼及相關產品，乃主要本土手機生產商（如華為、中興及聯想）嘅手機配件供應商之一。今年，公司嘅業務重點乃拓展內置雷射直接成型天線，主攻智慧型手機、手提電腦及平板電腦市場。

通達今年以來股價累升約五成。惟以尋日收市價計，一二及一三年度預測市盈率分別為8.5及6.6倍，息率分別為3.8厘及5厘，估值仲未算係貴。展望今年內地智能手機市場可保持穩步增長，本土生產商市佔率上升，類似富士康、通達等製造商，有望從中受惠。以通達為例，按一三年預測市盈率8倍計，股價可見0.72元。但當然，工業股升極有個譜，此股過去估值低迷，今年以來重估潮開始初期股價升得快，但相信升到上六、七毫子升勢會放緩，想買貨候回吐至0.55元或樓下再睇入市值博率較高，支持位可參考10日線0.5元。