樓市出更：利苑粥麵舊址 洽租貴倍半

銅鑼灣一線街舖呎租貴絕全球，舊式食店陸續頂唔住租金上升，要起身離場，劉Sir收到風，喺駱克道539號開業四十二年嘅利苑粥麵專家，上個月底光榮撤出後，聽講個舖位啱啱畀間國際連鎖鐘錶品牌洽租至尾聲，月租近80萬元，呎租大約800元，比起舊租多超過1.6倍，聽講好快成事。

雖然內地豪客嚟香港買貴嘢少咗，不過，銅鑼灣始終係佢地來港朝聖血拼必到之處，唔少商戶都唔放過喺區內搵舖，有代理爆料，上述原本由利苑粥麵專家租用達約四十二年嘅舖位，租約期滿業主將意向月租倍增至約60萬元，但麵店頂唔順，最後喺上月底唔租，個舖好快就畀一間國際鐘錶品牌傾租，月租近80萬元。

干諾道生生全幢賣3.5億

代理仲話，以上址面積約1,000方呎計，呎租大約800元，唔使1,000元一呎，喺嗰條街算係筍租水平。

另外，近期陸續有巨額資金流入上環，前年曾標售嘅上環干諾道西35號生生商業中心全幢商廈，據土地註冊處資料，原來已經賣咗，成交價3.5億元，以上址總樓面約4.2萬多方呎計，呎價近8,300元，算係合理水平，買家公司係JOINT GOOD CORPORATION LIMITED，公司註冊處有紀錄，該公司董事係方佩賢及梁日輝。

上環OVEST拆售 每層3千萬

第一太平戴維斯黎志健話，經過翻新同重新定位嘅上環永樂街77號服務式辦公室大廈OVEST都拆售，每層入場費3,000萬元起，呎價約1.5萬元起，租金回報率3厘多。

除上環外，美聯商業羅仲英話，北海集團（00701）或有關公司有份興建嘅灣仔北海中心，依家將佢地持有嘅18樓全層放售，意向價約8,000萬元，呎價約1.18萬元。

資金狂搶舖位，就連二、三線區橫街蚊型舖仔都有捧場客，中原（工商舖）謝靜嫻話，油麻地東方街近兩年來終於有舖位開齋賣出，新買家仲即買即放摸售，個舖位位於東方街11號地下11E號，面積僅250方呎，以1,205萬元連約賣，呎價4.8萬元。

該單位原業主兩年帳面袋約560萬元，賺幅約87%，並隨即開價約1,450萬元放摸售，較購入價開高約20%。