魚缸Blogger：帝盛酒店 強勢突破

最近有本港發展商拆售服務式住宅酒店，由於唔受BSD同SSD的限制，首批單位喺一晚之內就賣晒，尋日部分酒店股乘機借消息炒上，當中又以帝盛酒店（02266）最標青，埋單升逾7%，報2.28元。

活化工廈帶動增長

前稱麗悅酒店嘅帝盛，喺馬來西亞、內地及本港等均有業務，而過去兩年旗下本地酒店嘅入住率均超過九成。除此之外，集團亦都係本港第一間參與活化工廈嘅酒店發展商，其位於觀塘嘅首個翻新項目已經喺舊年七月開幕，預料今明兩年分別會再有兩個喺荃灣嘅工廈改建項目落成，可望帶動收入增長。

睇番走勢，帝盛尋日以一棍大陽燭成功突破旗形走勢，創下五十二周高之餘，成交額仲更急增至32球，相信唔會得一日貨仔咁短癮，下一阻力先睇2.5元，跌穿2.2元止蝕。

帝盛酒店（02266）

阻力位：2.5元

支持位：2.2元