股海實戰：天津發展 憧憬注資

內地股市繼續向下，市場流傳多個不利消息，有指兩會前後大型反貪風暴一觸即發，又有指多個城市下調住房公積金貸款額度，故見尋日房地產股份成A股跌市元兇。港股受到拖累，恒指午後跌幅擴大至逾200點，短期市況轉弱，宜減少短炒，以守代攻。

講到尋日A股跌市，另一說法係指人行進行正回購，但其實正回購數量唔係好多，喺春節長假前一周人行不斷向市場泵水以解流動性緊張，如今長假完結，適量收回過剩資金亦唔係咩大不了，照計暫毋須因此而自亂陣腳。

近兩、三年，有關天津市擬重組屬下公司資產嘅消息不絕於耳，最近聽表叔講，眼見其他主要城市屬下紅籌股重組資產後基金受落，有效加強海外融資平台功能，今年津系公司會加快落實重組，叫阿莊唔好走漏眼！

天津市屬下在港上市公司有天津發展（00882）、王朝酒業（00828）及天津港發展（03382），另天津市燃氣集團則持有天津津燃（01265）。去年十一月津發表示擬加快企業重組並拓展新業務，同月底，天津市政府由本來透過津聯集團控股津發，改為透過天津醫藥持有津聯集團再控股津發，雖然最終控股股東還是天津市政府，但股東架構多咗家天津醫藥，係咪為日後注資提供線索，不得而知。

另一點可注意嘅係，去年十月以來，基金BlackRock不斷減持津發持股，但天津醫藥卻不斷在市場增持津發股份，結果津發股價不跌反升，由去年十月下旬約3.6元水平，升到上尋日高位見5.79元，反映基金減持無礙市場對津發獲注資嘅憧憬。

津燃貨源極度歸邊

截至去年六月底，津發每股資產淨值約9.1元，現價較之仍有逾三成折讓，近兩三個月折讓收窄，某程度反映市場對公司重組嘅憧憬，且看嚟緊公布年度業績前後會唔會再有好消息。

講到呢系股份，阿莊最近亦有所聞，隻津燃都係炒注資概念，堅定流，阿莊亦非局內人，但可以肯定嘅係，呢隻股貨源極度歸邊，雖然今年以來股價累升已有七成，若然真係有咩重大動作，股價繼續挾高亦唔出奇，不妨耐心觀察此股喺2.9元水平承接。