樓市出更：公屋超細戶 價大晒

二手樓價升勢未停過，細價私樓升完，之後輪到細價公屋及居屋升。黃大仙公屋鳳德邨有個迷你單位，賣成128萬元，建築呎價直逼6,000元，相信係公屋呎價新指標。另外，港島南赤柱居屋龍德苑亦有個200多方呎單位，以建築呎價近8,200元成交，估計係屋苑新高。

劉Sir睇到啲成交資料，發現今個月鳳德邨紫鳳樓有個低層單位，賣咗128萬元。有代理講，呢個單位建築/實用面積214/164方呎，屬於迷你單位，計番個建築呎價去到5,981元，估計係全港公屋呎價新高指標，用實用面積計呎價更達7,805元，貴絕公屋。

居屋龍德苑每呎破8千

另外，有人爆料，居屋龍德苑承德閣低層單位，建築面積都係得283方呎，登記賣咗232萬元，建築呎價8,198元，呎價相信係屋苑新高，實用呎價過埋1.08萬元。

巨形特色單位都有「癲」價，中原溫明峯話，馬灣珀麗灣29座有頂層特色單位，建築/實用面積1,881/1,510方呎，有大平台同天台，港島客2,450萬元買咗，實用呎價16,225元，樓價、呎價都破晒成個屋苑二手新高。

業主愈反價、個價愈高。同美聯周永業傾開，西灣河逸濤灣1座高層複式單位，放咗盤成年，叫價3,588萬元，之前畀客洽購過，業主又封盤，但最近再賣3,680萬元，加價近百萬元，建築/實用呎價20,628/26,456元，創下屋苑紀錄。

家天下黎振傑都話，奧運站君滙港3座高層A室，加價15萬元賣咗715萬元，建築呎價11,440元，高個市價約5%。美聯吳紹輝講，藍田麗港城22座低層H室，反價20萬元，畀用家795萬元買咗，建築呎價8,466元。

太古城單日錄三成交

鰂魚涌太古城呢兩日多咗成交，中原張光耀話，太古城單日錄3單成交，隋宮閣中層H室賣1,170萬元，建築呎價約1.39萬元。睇番利嘉閣報告，上半個月50指標屋苑錄250宗買賣，比一月上、下半月跌左56%同62%，不過個價就升咗2.3%。