魚缸Blogger：中生製藥值得睇好

去年十月推介過嘅龍頭醫藥股中生製藥（01177），唔經唔覺股價由3蚊左右升到4個幾，如果跟買兼揸到依家都幾和味。上周五因為有報道指內地藥品市場將會繼續高速增長，所以即市一度挾到去4.74元，創咗五十二周新高，埋單仍升6.3%，收報4.67元，睇嚟5蚊關指日可待。

行業發展前景可觀

根據醫藥藍皮書，○五至一○年內地藥品市場的複合增長率逾兩成，而去年市場規模高達9,261億元人仔，預期一三至二○年將以年均12%高速增長，行業嘅發展前景可觀。

睇番成績表，中生製藥去年首三季營業額增長四成至61.3億元，純利激增逾倍至6.3億元，公司產品（肝病、心臟、癌症及糖尿病用藥）門檻亦高，加埋生物醫藥獲欽點扶持，實力可見一斑。中央鼓勵行業中強強聯合，發展趨勢傾向強者愈強，優質藥股值得睇好。

中生製藥（01177）

阻力位：5.20元

支持位：4.26元