Fundman睇市：翠華進入無阻力區

港股蛇年復市連升兩日，但成交奀到極，都係五、六百億貨仔。A股今日復市，到底上周港股純粹係一次後抽，抑或短期調整繼續，應可一清二楚。技術上，恒指10日線能否失而復得，會係後市關鍵。

睇新聞，一名男子涉嫌在網上散播打壓樓市措施消息被捕，史提芬無睇過內容，但農曆年假前，又確見過多間大行分析傳聞中新五條大辣招對樓市的影響，莫非今次真係空穴來風，齊齊中空寶？

政府辣招效果有限

政府連連出招，行政措施壓抑樓價上升速度，可惜遠水始終救唔到近火，君可見雙辣招推出四個多月，肯畀15%BSD的買家，居然達620宗之多，地產代理編製樓價指數也連升五星期，累積5.3%升幅。

樓市有愈撳愈升之勢，正如早前推出辣招時估計一樣，SSD 2.0及BSD確實令部分買家卻步，可是大部分樓市投資者，更加唔想換貨後被辣招綁死，結果供應與需求齊齊減少，樓價在低成交下反而因為超低息而繼續升，可見在一個無匯率彈性及利率調節的地方，政府能夠做的確是極其有限。

最近股神巴菲特夥拍私募基金3G Capital，聯手出價230億美元收購百年老字號，以番茄汁聞名於世的食品巨企亨氏（H. J. Heinz Company）。

唔好以為股神無寶不落，亨氏一定買平，事實以每股72.5美元收購價計，相當於一三年20.5倍預期市盈率，同股神上市旗艦巴郡其實差唔多。亨氏業績無驚人爆炸力，着眼的，無疑是長遠盈利能力。

講開又講，本地餐飲股翠華控股（01314）股價愈升愈有，上周五收3.92元，創上市後新高。個人意見，香港高通脹掀起餐飲業加價潮、最低工資立法、以及中產在樓市泡沫中帳面身家上漲feel good，都係走中高檔價錢茶餐路線的翠華，愈做愈旺的原因。

翠華股價升穿掛牌後第一個浪頂3.48元，技術上進入無阻力區。但從基本因素睇，一三年預期市盈率35.6倍，能否繼續交出35%以上的年增長，支撐高估值，是翠華後市的一大疑問。

之不過，眼見大家樂（00341）及大快活（00052）一三年PE都去到24.9同埋15.9倍，高於歷史平均值，市場反應似乎告訴大家，唔使幾耐我哋要80蚊先食到個焗豬扒飯，或40蚊個下午茶餐。