股海實戰：金威啤酒 人棄我取

上周兩個交易日港股交投淡靜，料本周A股復市能為後市提供更明確嘅方向。展望首季餘下時間，魚缸兩大焦點分別係企業業績以及內地兩會，上周五城鎮化及前海概念股率先翻炒，不妨多加留意呢兩個板塊。

長假前，金威啤酒（00124）終於落實出售啤酒資產交易，得主正係呼聲最高嘅華潤創業（00291）。具體係華創以55億元人仔（折合約67億港元），悉數購入金威嘅啤酒資產。由於內地啤酒市場已歸邊，兩三家大啤酒廠經已雄霸天下，類似金威呢類地區性啤酒企業，「戒酒」轉行未嘗唔係一個解脫。今次算係買個好價，公司擬派發特別股息每股1元，交易公布後首個交易日股價曾高見3.95元，早前買入博成事嘅投資者，肯走嘅話戰績都幾唔錯！

今次交易另一重點，乃公司清楚講明日後將專注拓展地產發展及投資業務，並擬易名為「粵海置業」。目前粵省旗下嘅粵海投資（00270）雖然亦有兼營房地產業務，但主業係供水；廣州市政府從事內房業務嘅則有越秀地產（00123）及越秀房託（00405）。如今金威變身內房股，變相成為首家由粵省政府直接控股、打正旗號搞專營房地產業務嘅香港上市公司，唔排除為日後同系公司重組房產相關業務，甚而獲母公司注資埋下伏線。

還有，交易通告披露，金威擬將深圳一土地更改為房地產項目，該地皮處於深圳市羅湖區布心片區，由於官方擬將布心片區及鄰近嘅水貝片區重建成珠寶設計、生產、展覽及銷售中心，故公司擬將一廠地皮發展成商業房地產項目，估計拆遷工作會喺今年九月展開，首期總樓面面積10萬平方米將於一六年中落成，各佔總樓面面積18萬平方米嘅二期及三期項目將分別於一八年底及一九年底落成，預計整個項目耗資36億人仔。

不排除有配股需要

由於粵省政府揸住金威七成多股權，股份流通量一向唔算太活躍，相信一旦公司再落實新投資項目，進行配股活動可能性甚高，除咗可以集資之外，亦可藉此擴闊股東基礎，改善市場流通量，所以往後呢隻股應該唔憂冇消息炒作。

金威現時市值56億元，交易可套現67.8億元及錄得34.93億元收益，料可於本年度業績反映。憑着控股股東嘅背景，未來可望喺內房板塊中佔一席位。是次交易截止日為今年九月五日，距今仲有逾半年時間。交易公布後其股價由高位3.95元回落至現價3.29元，相信待震走投機客後，股價自可見真章，中長線不妨人棄我取，逢低收集。