樓市出更：天榮站項目大財團之爭

港鐵（00066）天水圍輕鐵天榮站上蓋項目今個星期三截標，市場透露補地價金額約26.86億元。由於涉額唔算細，區內無項目在手嘅發展商相信未必會參與，劉Sir認為最後會由大型發展商競爭居多，以區內最有發展經驗的長實（00001）投標呼聲最高，另有測量師老友都估計標書可能少過6份。

上述天水圍輕鐵天榮站上蓋項目早前總共收到16份意向書，其實反應唔算太差，好似長實、新地（00016）、恒地（00012）、新世界發展（00017）及信置（00083）等主要大型發展商都有拎「入場券」，劉Sir個人認為，持有區內龍頭嘉湖山莊及栢慧豪園嘅「大地主」長實，估計很可能會把握機會入標以擴大區內版圖。

會地信置等有興趣

測量師老友就估計項目最後會成為大型發展商之爭，高緯環球張翹楚話，項目補價金額話大唔大，但始終唔係講緊「十億八億」，加上區內樓價仲係低水，而且計埋公屋同居屋，該區供應唔少，市場又有其他地皮可以選擇，所以截標反應未必會好似預期咁好，估計最後入標財團會以大型發展商為主，標書數目可能會少過6份。

唔少拎咗「入場券」嘅發展商都同劉Sir透露過有興趣入標，好似長實同新地；會德豐地產主席梁志堅講過，集團會考慮以獨資形式競投；信置聯席董事田兆源都話會研究。

樓面呎價估三千一

呢個天水圍輕鐵天榮站上蓋項目，總發展樓面約98.2萬方呎，提供住宅單位約1,600伙，早前有消息人士向劉Sir透露，項目獲地政總署批出補地價金額約26.863億元，每方呎補價金額約2,735元，如果計埋入場費約4.1億元，每方呎樓面地價約3,152元，同市場之前最高估值都唔係相差好遠，所以劉Sir覺得截標反應未必會太悲觀。

劉Sir