魚缸Blogger：創維數碼 破位在即

被大行欽點做利是股嘅創維數碼（00751），蛇年第一個交易日延續旺勢，升穿好耐都無見過嘅5蚊關，收報5.15元，升幅4%，可炒城鎮化概念兼新政策憧憬！

創維上月電視機總銷量按年增長58%至144.6萬台，銷售額上升91%，而自去年四月起計，總銷量增長23%至1,011萬台，銷售額上升30%，部分係受農曆新年的季節性因素影響，同埋內地推出節能家電補貼刺激消費。另摩通同瑞信齊齊發表報告唱好，前者話創維喺農村地區有大量客仔，繼續睇好公司業務前景，而後者就話新推出嘅超高清電視機有助穩定毛利率，分別畀佢目標價6.7元同5.9元。

創維股價尋日即市接近掂到一一年七月高位5.2元，若成功突破阻力，睇勢話唔定可以踢上5.9元。

創維數碼（00751）

阻力位：5.90元

支持位：4.76元