Fundman睇市：濠賭股 宜短不宜長

蛇年第一個交易日，港股順利跟住ADR價。來個紅盤高收，恒指全日升198點，報23,413點，全日波幅唔大，得169點，成交得578億，乃踏入一三年以來最少，反之沽空佔大市成交比例，昨升至11.25%，是去年九月五日以來最高，捱打多時的淡友，看來試圖反撲。

過年前，走勢相對弱的內房及濠賭股，都見技術反彈，不過博唔博自己諗。消息指新春長假訪港、澳旅客數目大增三成，另外，亦有博彩業研究報告指春節前後六日假期，到訪澳門的內地客比去年春節同期大升28%，斷估二月濠賭股中場收入，應該可以維持唔錯升幅。

新春團拜期間，同來港賓架飯敍，了解近日反貪局勢有幾激烈。老友話近期相約內地官員飯局，已經去到可免則免地步。下個月，習近平正式接任國家主席後，肅貪力度可能比現時更厲害，會唔會二月過後梳打埠又再水盡鵝飛？好難講，但濠賭股本身已經唔平，對負面數據承受能力唔高，總之博反彈都係宜短不宜長。

美銀美林同基金經理做一項調查，顯示環球基金手持現金比例，維持在3.8%水平不變，不過，預料未來兩年唔會出現經濟衰退、企業盈利展望向好的芬佬比例達87%，是兩年來最多。

十二月中下旬之後，新興市場股市跑輸已發展市場，然而調查發現基金資產配置取向上，有多少出入，43%表示會增持新興市場股市比重，38%認為新興市場貨幣被低估，在現金比重比正常3至3.5%高下，看來新興市場包括內地A股，升浪仲可以維持多一段日子，手上有安碩A50（02823）、華夏滬深三百（03188）一類指數基金的，應該可以放心持貨。

家電股穩陣可捧場

近三兩個月銷售數字一直都好過市場預期的家電股，蛇年首日走勢的確係標青，兩隻電視股即市雙雙創過五十二周新高，創維（00751）升4%，報5.15元，而TCL多媒體（01070）亦升1.1%。摩通出報告，睇創維6.7元，建議增持，另外兩隻家電股，海信科龍（00921）以及海爾電器（01169）都分別升1.7%及7.6%，收報4.12及14.3元。其實呢幾隻家電股估值都只係單位數字，與其博周期股業績復甦PE回落，倒不如穩穩陣陣睇番家電股更為上算。