股海實戰：保障房概念 有鑊氣

蛇年首個交易日，港股紅盤高開高收，但成交不到600億元，表現喺預期之內，相信今日指數表現牛皮，等候下周A股復市再覓方向。

尋日升市，大笨象（00005）及內銀股功不可沒，潤地（01109）及民行（01988）分別升13.29%及5.7%，成為升幅最大嘅恒指及國企成分股。此外，上月底阿莊話可反覆向7元關推進嘅中糧包裝（00906），尋日以全日高位6.8元收市，升8%，睇嚟目標好快實現！

光伏股亦見鑊氣，保利協鑫（03800）升一成，事緣有報道指內地光伏企業銷售明顯增長，部分光伏產品出現價量齊升。阿莊就認為，一個行業要由谷底回升，實在需要時間，今年光伏股仍然未步入坦途，但情況會較去年有所改善。抱着投機心態，睇實成交跟炒尚可，仍持有高價蟹貨者，策略可多走幾轉溝淡貨底。此外，上周三阿莊話要（目及）實嘅頁岩氣股走勢亦對辦，好炒可選宏華（00196），穩陣可揀珠江鋼管（01938）。

今年全國各地保障房將迎來交付及入住高峰，勢必帶旺周邊行業，尋日見到家電股普遍做好，海爾（01169）升7%、TCL多媒體（01070）升1%、創維（00751）升4%，料整個板塊短線可保強勢。喺消費類別中，其實汽車亦係熱門產品，事關如今內地城鄉家家戶戶至少有一部私家車代步，經已唔係新聞，隨着農村經濟持續發展，部分家庭遷往城市居住，將為汽車消費穩定增長帶來有力支持。喺眾多汽車股之中，論短線走勢，吉汽（00175）幅圖最像樣，短線升穿五十二周高位4.39元，下站阻力喺4.65元，初步支持喺4.15元。

新華保險逢低收集

MSCI進行季檢，將人保（01339）、新華保險（01336）及綠城中國（03900）納入MSCI新興市場指數，三隻新貴尋日升幅介乎2至4%。

其實話新華保險入MSCI系列指數經已講咗一段時間，早喺該股前年底掛牌，阿莊都講過呢隻係表叔們睇好嘅內險股。過去兩年，新華保險積極調整產品結構，提升利潤率，相信今年業績可逐步見到調整結構嘅成效，加埋成為MSCI新興市場指數新貴，有望再次吸引基金目光，策略宜逢低收集，年內股價目標再次挑戰五十二周高位37元，主要支持喺27至28元水平。