樓市出更：胡文新億元掃深9

名人買樓向來鍾意用公司名義，勝在夠密實，但係舊年實施咗買家印花稅（BSD）後，唔想畀多15%嘅稅款，只好紛紛以個人名義入市，令到最近名人買樓無所遁形。合和（00054）董事總經理胡文新最近就用自己名，以1.068億元買入港島南深灣9號一個特色單位。

劉Sir近期睇到土地註冊處資料，胡文新（WU THOMAS JEFFERSON）買入深灣9號一個頂層複式連平台單位。據了解，個複式單位建築/實用面積2,931/2,345方呎，另連平台面積431方呎，以成交價計，建築/實用呎價36,438/45,544元。若果呢單成交用公司名義買入，涉及稅款就超過1,600萬元。

實用呎租80元回報佳

胡文新係合和主席胡應湘嘅公子，公司本身都係從事物業發展，近排就賣緊跑馬地樂天峯，所以今年買入深灣9號唔知用嚟投資定係自用。

講開深灣9號，個盤入伙以嚟，租務表現都唔錯，租金亦都無出現新盤入伙照例低開嘅情況，之前有個1座建築面積約2,501方呎單位，就以月租約16萬元租出，建築呎租達64元，實用呎租更加去到80元。

劉堃4570萬買嘉雲臺

另外，劉Sir尋日喺土地註冊處亦發現到另一個成交，渣甸山嘉雲臺1座有個低層A室，連車位賣咗4,570萬元，登記買家叫劉堃（LAU KWAN CHRISTOPHER）。

記憶所及，前民政事務局常任秘書長李麗娟（媽打）嘅仔仔都係叫劉堃，英文名咁啱都係CHRISTOPHER，至於會唔會係同一個人，咁就要搵日問吓媽打。

至於個單位建築/實用面積2,242/1,806方呎，建築/實用呎價20,384/25,305元，以近排市況嚟講，個價都算合理。