股海實戰：中國建築 財源廣進

蛇年伊始，阿莊在此祝願各位股友投資得心應手，萬事勝意，身體健康！展望本周市況，由於A股尚在休市，且唔少基金經理都攞多兩日假，等下周初先埋位，相信今、明兩日市況維持偏靜，但指數有望略作反彈，皆因上周市場盛傳政府將再次出招打擊樓市炒風原來係流料，地產股有望作出反彈。作為參考，恒指向上首兩個阻力分別喺23,500點水平及下跌裂口頂部23,637點，向下50日線支持喺22,958點。

北韓突然核試，亞洲地緣政治風險升溫，但見尋日韓股表現冷靜，首爾綜合指數收市升1.5%，暫看局勢可控，宜靜觀變化，別掉以輕心。

受惠政府大興土木

未來幾年特區政府將大興土木，十大基建如火如荼，加埋興建大量公營房屋，建築股肯定係受益者，近期見到唔少建築股報喜，好似新昌營造（00404）上月上旬披露，已接獲三份新合約，應佔總額約39億元，計及手頭未完成合約工程，目前應佔工程訂單嘅未完成工程額已達到259億元。另一家阿莊早前提過嘅建築股有利集團（00406），上月先後兩次公布獲公屋承建合約，兩份合約總建造成本合共逾59億元，足見業界真係接單接到手軟，可以話係回歸以來嘅最好日子！

行業步入榮景，買二線建築股唔係唔好，但係普遍交投唔太活躍，想買多都唔容易，若然想搵流通量較高者，龍頭股中國建築（03311）可視為首選。上周五，中國建築宣布今年一月份累計新簽合約同比增長近一倍至75億元，相等於完成今年全年目標嘅18.75%，截至上月底在手總合約額達到997.4億元，其中未完成合約額約634億元，同比增24%，足夠未來三年建造，表現比阿莊預期好。

該股業務可分為基建投資，以及現金工程及相關業務，其中後者主要收入來自香港，其次係澳門同內地；至於基建投資，則包括基礎設施及保障性住房類，國策概念毋庸置疑。該股將於三月下旬公布去年度業績，估計現價一二及一三年預測市盈率分別為18倍及14倍，唔排除業績公布後，大行會再上調估值。

上周初，中國建築宣布擬發行以美元計值擔保票據，但經驗相告，呢類集資活動期間，股價表現一般唔會太差。再睇走勢圖，主要支持喺9.6至9.7元，即上升裂口頂部及50日線所在，年內目標反覆向12元推進。