樓市出更：黎永滔睇舖租升10%

喺香港同英倫揸住物業市值接近百億元嘅投資者黎永滔（滔哥）認為，全球通脹將有增無減，因港股上落較大，睇怕啲錢都係流落去磚頭，尤以工商舖市場。但情況未必如幾年前咁一窩蜂湧入，以商舖為例，近幾個月內地豪客嚟香港買貴嘢少咗，間接拖低商戶搶租一線街舖，租金自然受壓，相信核心消費區舖租升幅只約10%。

滔哥同劉Sir講，投資者為抗衡通脹都會狂買金、股、匯、樓，不過，股匯市場相對比較波動，揸實物「磚頭」風險較低，就算樓市「大冧」，都可以暫時收吓租。

按揭收緊 成本增加

唔少物業代理話今年游資會大量湧入工商舖市場，不過，滔哥認為，近年銀行睇緊咗工商舖物業按揭，成數一般只係約五成左右，所以實際投資額大過住宅物業投資，加埋呢類物業好考眼光，以舖位為例，同一條街，街頭、街中間或街尾嘅做價同埋租金都好唔同，買錯嘅話，好易會「坐艇」，所以上述兩項辣招只會加大投資者買工商舖嘅意欲，一窩蜂將啲錢轉買嘅情況就未必。

額外印花稅唔治本

他舉例，近幾個月內地豪客來港消費少咗，唔少核心消費區商戶都唔搶租地舖，該等街道租金升勢自然受阻，相信今年核心消費區舖租升幅只約10%，未必好似幾年前咁租金會以倍數增長，相信投資者短炒舖位都會少咗。

對於政府加強額外印花稅力度，滔哥話，唔係「治本」好方法，反而會令市場買賣放盤仲少咗，市場供求更失衡，樓價都好難回落。房價飆升主因係土地供應長期短缺，政府應明確制訂長遠房屋供應策略，仲更加有實質作用。佢仲話，本港唔同物業買賣中，外地人佔好小部分，上述措施對樓市影響其實好輕微。

近年滔哥業務趨向多元化及國際化，佢笑笑口話，其中總投資約9億元嘅旺角文華大型商場1及2期，目前已全數租出。而旗下灣仔皇后大道東102號的「皇后100」共3項服務式住宅，現時以包租形式租晒，每月收租共約200萬元。

至於在一○年底斥約3,815萬英鎊買嘅英國倫敦牛津街221至223號大單邊商用物業，依家每年租金收益約180萬英鎊。

黎永滔旗下主要物業現況

旺角文華1及2期大型商場

規模：約1.2萬方呎

備註：現時全數租出，租戶包括歐、美連鎖服裝品牌。

三項服務式住宅：

灣仔皇后大道東102號的「皇后100」、灣仔告士打道217號及中環士丹頓街9至11號

規模：房間近90個

備註：包租形式每月約200萬元租出。

銅鑼灣景隆街7號顯輝中心全幢寫字樓

規模：近4,000方呎（重建後）

備註：全幢拆卸重建一幢4層高巨舖，意向月租約200萬元，較現時租金將有逾兩倍升幅。

英國倫敦牛津街221至223號大單邊商用物業

規模：6層高

備註：現時每月收租約180萬英鎊。