股海實戰：冠捷科技 逆市奇葩

等待已久嘅跌市終於來臨，而且一跌就五舊幾，料恒指跌到落22,800至23,000點可暫時喘定，春節後市況就要睇短期特區政府係咪真係一如傳聞所指，有新嘅打擊樓市炒風措施出台，以及外圍股市呢浪調整有幾深。

尋日跌市個股跌幅全面，連近期走勢偏強嘅內銀股亦回軟，民行（01988）跌5.8%，農行（01288）及中行（03988）同跌3.8%。大市剛開始調整，阿莊先前估計調整浪幅度可能約5至10%。之不過，調整期間仍會有個別板塊異軍突起，如尋日鐵路股表現唔錯，而抖氣抖咗成個月嘅頁岩氣股亦似乎整裝待發，仍在尋覓跌市奇葩者，不妨多加關注相關股份，如宏華（00196）、珠江鋼管（01938）及安東（03337）。

內房股政策風險增

萬科同恒大（03333）嘅一月份銷售量同比均大升，但須注意去年新春喺一月，今年喺二月。換言之，今年一月嘅比較基數較低，同比增長參考性要打個折，難怪消息對內房股表現缺乏刺激作用。

再睇三隻大型內房股嘅走勢圖，中國海外（00688）、雅居樂（03383）及恒大（03333）自去年第三季展升浪以來，未曾跌穿過50日線，但近周卻紛紛失守50日線，而華潤置地（01109）現價與50日線亦差距不遠，究竟呢個板塊迎面而來嘅調整會有幾深，係咪預示政策風險正在上升，投資者別掉以輕心。

規模效益搶市佔率

回說尋日嘅跌市奇葩，其中一隻係較生面口嘅工業股冠捷科技（00903），股價升4.6%，收報2.49元，成交2,757萬元，成交股數按日增逾兩倍。去年，冠捷聯同飛利浦合資公司TP Vision與樂金電子（LG Electronics）成立「智慧電視聯盟」，料有助加快智慧電視產品發展。事實上，過去十年八載，電視產品由過去CRT發展至LCD，至如今LED，甚至係多用途嘅智能電視，機身愈來愈薄，功能愈來愈多，但價錢卻愈嚟愈平，消費者自然係贏家，廠商就要靠技術同產銷上嘅規模效益來搶奪市佔率。

睇冠捷去年第三季度業績唔太差，賺2,713萬美元，首三季則賺5,702萬美元。隨着去年下半年美股再推量寬措施，加埋中國等新興市場消費強勁，宜留意嚟緊公司公布去年度業績，披露有關TP Vision推出更多中低端產品搶攻市場份額嘅成效如何。走勢上，短線若能以大成交踢穿前年第三季以來嘅阻力區2.6元水平將現突破，則阻力區將上移到2.8至3元，回吐宜守20日線2.32元。