黃仰芳投資理想人生

身為潮州人的新鴻基尊尚資本管理高級董事黃仰芳（Fonia），從小便培養出慳錢習慣，並立志搵錢改善家人生活，但Fonia表示，要「錢」途無限，開拓收入來源才是不二法門。

事實上，Fonia揚言只會留數千元現金傍身，並用盡95%的資產去投資。「我會將財產劃分三等份，分別投資在物業、股票及基金。」她說，這個方法不但可以減低風險，亦毋須經常睇實個市，容易控制。

不過，Fonia的投資路卻非一帆風順。大學時她曾聽從朋友推介，以一萬元買入一隻股票，結果，事隔多年股價依然只跌無升，現時僅值幾百元。她提醒投資者「唔識真係唔好買」。

唔做公關投身證券界

「投資最忌盲從，慶幸當年出師第一仗下場慘敗。否則因為好彩而贏錢，總有一次會輸得更慘。」

出身基層的Fonia，自小盼搵錢改善家人生活。「中四時班主任問我將來想做咩，我話要做生意搵錢。」因此，○三年Fonia放棄傳訊公關工作，踏足證券界，除可以把握工作之便學習投資，亦因為這行業只要肯搏肯捱，花紅一定少不了，算是多勞多得。

入行初初五年，Fonia過着朝九晚十一，連朋友也無法見的忙碌生活。直至一次遇到一位炒股好叻的人，讓她明白金錢不代表一切，如何運用賺回來的金錢去平衡生活，才算是理想人生。

「當時認識一位炒股好叻嘅客人，大學三年級已經退學，實行專注炒股，雖然喺股票市場上贏咗唔少，但三十幾歲人仲好似唔太識同人相處，我開始明白平衡生活比搵錢更重要。」

現時，Fonia已經晉升為新鴻基尊尚資本管理高級董事，為客人建立投資組合，而個人事業亦見成就，加上投資得宜，Fonia常常忙裏偷閒，到處旅遊玩樂。

豪花六十萬周遊列國

除了玩球類活動減壓，Fonia最愛周遊列國，一年至少要去六次旅行，足迹踏遍歐亞。去年，Fonia更豪花六十萬元，三個月內漫遊南美洲、法國、北海道及泰國等地方。「印象最深刻係參加巴西嘉年華，everywhere、 everytime都好似開緊派對咁，令我大開眼界！」能夠如此大手筆享樂，Fonia的生活，豈不羨煞所有打工仔？

自我增值 結識真正朋友

所謂「出外靠朋友」，向來熱衷於社交活動的黃仰芳（Fonia）就話，朋友唔使多，最緊要啱！

怕醜女變少年領袖

原來，Fonia中四之前乃怕醜女一名，後來因為參與少年警訊，漸漸培養領袖風格，不但見多咗大場面，亦有幸與城中猛人共餐，因而收集了不少名片。

客源向來是證券行工作相當重要的一環，Fonia本以為自己已經很用心建立人際網絡，其行家兼恩師卻提醒她，朋友貴精不貴多。

「當時佢哋叫我做『Name Card Collector』，雖然見過好多政商名人，但得我識佢哋，佢哋唔會記得我。」

自此Fonia明白要先自我增值、培養個人情操，才交到真正「啱用」的朋友。

黃仰芳小檔案

現職：新鴻基尊尚資本管理高級董事

學歷：理工大學市場學學士、清華大學法學學士

履歷：Strategic Development Group公關及市場經理、美國培基證券投資顧問、瑞士尊貴理財資深副總裁

興趣：旅遊、球類運動