樓市出更：交吉有樓睇 價即超前

依家嘅二手樓市乜都有可能！唔理一線定二線屋苑，只要交吉有樓睇嘅放盤，樓價一定可以跑出。好似沙田好運中心做價一向都差過同區沙田中心，但啱啱好運中心有個河景交吉盤，建築呎價逾9,500元轉手，打破沙田中心紀錄。牛頭角得寶花園都有「迷你」單位，實用呎價賣高過1.1萬元。

美聯陳國良講，沙田中心個價一路都高過好運中心10%，但市場無晒盤，近日好運中心有個柏林閣中高層G室，建築/實用面積418/326方呎，唔算最靚貨，但有河景、靚裝修，加埋交吉有樓睇，有用家用398萬元買入，建築/實用呎價9,522/12,209元，創屋苑新高外 ，仲掉轉頭貴過沙田中心高位，如果無記錯，沙田中心最高建築呎價都係9,400元左右。

雅典居睇樓要收費

實用率較低屋苑呎價已過萬，牛頭角得寶花園實用率低啲，但當同區德福花園同淘大花園都破頂後，市傳得寶花園C座高層單位，賣咗成288萬元，建築呎價大約8,397元，創屋苑新高，實用呎價去到大約11,383元。

世紀21奇豐黎建峰話，西沙帝琴灣凱琴居11座中層B單位，連車位賣1,050萬元，建築呎價6,954元，創同類新高。劉Sir亦收到料，由於馬鞍山雅典居近日睇樓量爆升，有一個叫價720萬元低層單位放盤，向每個睇樓客收30元入場費。

破頂點少得港島樓。中原盧鏡豪講，鴨脷洲海怡半島29座中層街景單位，賣600萬元，建築呎價約8,837元，創同類新高。消息又指，鰂魚涌太古城逸天閣中層單位賣1,150萬元，都係同類新高價。

富榮綠表賣420萬

至於居屋方面，富誠地產林栢榮爆料，黃大仙翠竹花園10座中層H室，賣407萬元，建築/實用呎價6,176/6,898元，創屋苑新高。世紀21中華連錦鏢話，旺角富榮花園13座中層三房單位，綠表賣成420萬元。