魚缸Blogger：雅士利 低位有承接

上周五兩隻奶粉股一度畀人狂掟，事關新西蘭牛奶被檢測出低含量的有毒物質雙氰胺，雅士利國際（01230）同合生元（01112）分別下跌12.5%及4.3%，收報2.44元及31.05元。上周四兩者先啱啱創咗2.8元及32.55元的52周新高，加埋消化毒奶問題，出現調整亦唔出奇，其中雅士利以大陰燭失守10日同20日線，不過喺低位2.35元有承接，不妨（目及）實博反彈機會。

上周發盈喜嘅雅士利，預期截至去年底止全年溢利將比去年大幅增長，原因係營銷策略及渠道拓展帶動收入穩定增長、去年原奶價格趨向穩定令毛利率有所提升，以及持續精細化的業務管理降低銷售費用率。內地人搶購奶粉潮，由香港伸延至澳洲、新西蘭等，搞到人哋都要出動奶粉限購令，而雅士利亦已在新西蘭自建奶粉廠，以加快新產品升級同確保原奶供應，項目將於一四年開始投產。今次新西蘭政府無公開涉及嘅牌子或生產商，相信事件對公司的影響仍有待跟進。

雅士利國際（01230）

阻力位：2.80元

支持位：2.23元