Fundman睇市：李寧焗供無得揀

上星期港股五日跌足四日，不過連埋星期五跌嗰18點，成個禮拜跌得21點，收報23,580點，指數睇落變化唔大，但唔少二三線及當炒股份，炒風收斂，跌勢相當明顯。基金經過十二、一月的一輪衝峰，對不少累積升幅驚人的中小型股份轉趨審慎，情願減磅換番去基本因素較有保證的指數股。不過，資金未有積極流走迹象，亞洲新興市場、中國及日本上周都繼續錄得淨資金流入，短期大市仲係大漲小回格局，不過資金變得揀擇，唔似上個月及本月初雞犬皆升，卻是事實。

預期全年業績見紅的熔盛（01101），大股東張志熔以專注私人業務為由，在熔盛及恒盛（00845）兩間公司管理上全退之後，上星期進一步將手上47.75%熔盛股份，當中的11.43%及7%，分別售予主席陳強及無償送贈予父親張德璜（前者每股作價1.674元），自己保留29.32%股份，顯然又是刻意避過三成全購門檻，意味將來找到新買家，也毋須向小股東同價提全購。兩年多前，因為管理層打造全中國最大民營船廠的願景，而以每股8元認購的小股東，未知會否感到壯志未酬身先死？

數到最令人慨嘆的，還是前中國體壇猛將李寧的同名公司，李寧（02331）上星期宣布以罕有的方式集資18億元，股東每持2股獲發1份「可換股證券」，將以每股3.5元換股，較消息公布前大幅折讓43.6%。上周，聽到唔少芬佬對此事媽聲四起，話晒供股，即使唔供至多賣掉供股權，等想加碼買入股權者去供，賣點供股權點都攞番啲渣。

換股證方式惹爭議

今次最令人不滿的，是所發的屬於不會掛牌買賣的零息可換股證券，小股東變相「焗供」，最慘部分股票基金章程規定不可參與供股，又無供股權可賣，焗住輸之餘，仲畀包銷的兩大股東非凡中國（08032）及TPG低價增持機會。因發「可換股證券」的同時，大股東同TPG手上的一批可換股債券，換股價獲大幅下調，一下子由價外變價內，選擇唔供或者無能力供的投資者，實質被攤薄的幅度更大。

事件令人看清大股東借殼非凡中國以小控大的目的，經歷金融市場歷練，由體操王子變成財技奇人。老實講，小股東惟有站在非凡中國及TPG一方，先掏腰包換股，等反彈機會來臨再同佢講拜拜。