樓市出更：屯門盤唔忌辣 價跳四成

政府推出額外印花稅（SSD）去壓抑炒風，但反而令市場盤源更少，樓價升唔停。而舊年錄最多SSD「辣招盤」成交嘅首十個主要屋苑，全喺新界區，沙田第一城及天水圍嘉湖山莊以約32與約31宗穩奪頭兩位，反而唔起眼嘅屯門豫豐花園「爆冷」錄到約19宗成交，佔據第四位，當中有5宗成交樓價升逾四成。

劉Sir睇到近兩年樓價有升無跌，令到更多SSD「辣招盤」可以有斬獲離場，舊年印花稅署就確定有約1,755宗須繳納SSD稅款嘅個案，而根據土地註冊處資料，細價住宅樓價升幅仲好過唔少中大型單位，所以舊年最多SSD個案嘅屋苑，大部分係細價屋苑，反映用家趕上車搶盤情況愈來愈激烈。

豫豐扣稅獲利80萬

只屬二線屋苑嘅豫豐花園，全年就有約19宗同類登記，每宗樓價升幅約15至49%，當中5宗升幅更逾四成，好似屋苑13座中層E室，建築/實用面積767/568方呎，原業主喺一一年三月以218萬元登記買入個單位，揸到舊年十一月就以約313.83萬元賣出，期內樓價升咗95.83萬元，升幅近44%，即使扣埋5%SSD，帳面都有約80萬元賺，計落都幾和味。

金獅交投贏藍籌盤

而實用率只得六成幾嘅金獅花園，勝在入場費只係200餘萬元，投資風險比較細，所以炒味仲濃過啲一線藍籌屋苑，舊年流通率更係三十大屋苑之首，全年錄約304宗買賣登記，流通率高達10.7%。

上述屋苑去年錄約23宗SSD成交，每宗樓價升幅介乎約12至47%，其中2期B座高層3室，建築/實用面積452/282方呎，原業主揸咗一年多，到舊年十月以241.5萬元賣出，扣除5%SSD，帳面都賺咗超過51萬元。

屯門、天水圍區向來係上車人士嘅尾站，但原來舊年亦係SSD成交嘅溫床，兩區合共有5個屋苑進身十大，佔比例高達五成。

除嘉湖山莊及豫豐花園外，屯門大興花園以15宗成交佔第七位，而叠茵庭與屯門市廣場都分別錄到14宗與13宗成交，分別佔第八與第九位。