日本大膠公仔升破十萬

一般在70年代出生的男孩子都玩過大型膠公仔，玩具迷統稱為大膠，主要以70年代的日本人氣機械人動畫為主角，當年售價只不過幾百元，但由於產量少、年代久遠，加上愈來愈多玩具迷收藏，升值潛力極強，只要夠眼光，揀中既新淨又罕有的大膠，隨時升值過萬元。玩具收藏家Raymond珍藏的大膠太保郎，更升值至十一萬元，未來還有升值空間。

Raymond本身是玩具迷，97年將興趣化為事業，創立ToyZone玩具店，在他眾多收藏品中，大膠最齊最罕有，升值亦最厲害。第一款大膠是Popy於1973年推出的鐵甲萬能俠，推出後大受歡迎，掀起大膠熱潮。

有盒齊件最保值

大膠價值高，很大程度上是因為產量少，但Fans卻眾多，在物以罕為貴的情況下，價值不斷攀升。Raymond表示：「大膠二手價一直高企，特別是近年不少日本玩具收藏家將大量罕有大膠放上網發售，由於保養得好，齊盒又齊配件，故將炒價推至歷史新高，閒閒哋十幾廿萬日圓一個，其他玩具迷見大膠有價有市，亦紛紛將二手價上調，令整體大膠市價直線上升。要睇一款大膠值幾多錢，首要睇罕有程度，好像太保郎、巨靈神UFO飛碟、大空魔龍等，由於產量少又多人喜歡，升值過十萬元都不出奇，其次就是保養程度，現時網上或二手店出售的大膠，部分沒有盒，如果有盒又新淨，價錢可以差幾千元，加上玩具迷對配件亦很執着，好像百變龍頭上的飛彈，或大空魔龍背上的尖角，配件齊全價值會更高。」

勤上網掃靚貨

現時要搜購二手大膠主要有兩個途徑，一是親身去日本二手玩具店尋找，其次就是上日本拍賣網。Raymond教路：「我經常去日本選購二手大膠，主要是到東京或大阪，去之前買一本日本二手玩具店指南書，然後就逐間去尋寶，前幾年當大膠價錢未升得那麼高時，不時會找到抵買平貨，我其中一隻鐵人28號就是在日本買的。其次，日本定期都會舉辦玩具展，當中亦有人將珍藏大膠拿出來放售，嫌去日本掃貨麻煩，亦可透過日本拍賣網掃貨，只要勤上網，做定功課格價，隨時可以平買貴賣，賺幾個開。」