陸東瞓身撐港交所

Look's Asset Management董事總經理兼投資總監陸東昨出席投資講座時，透露私人投資持有不少港交所（00388）股份，除長期持有外，當有閒錢就再入貨。

他坦言：「我喺50蚊、150蚊及160蚊都買過港交所，我唔會沽出。因香港只有一個『合法賭場』，佢就係港交所，做獨市生意喎！股息率有四厘，好過去買樓投資喇，仲唔使畀印花稅！加上家陣B股轉H股係大勢所趨，只要牛市來臨，大市成交額增多，呢類股票一定升得好緊要！」

指人民幣低估20%

今年中國經濟復甦，市場對人民幣升值預期再度升溫。陸東則指，現時人民幣幣值被低估約20%，預期需用五至八年時間去達到合理水平。若中國經濟穩健向好，人民幣年均可升值2至4%。

他稱：「八十年代後期，日本仔聽美國佬話，將日圓大幅升值，咪傻仔行為囉！今時今日，美國不斷催促人民幣要加快升值速度，但現時中國係美國嘅債主，中國先唔會驚佢。」他預期未來人民幣只會穩步上升。

近期不少前海概念股被炒起。陸東認為，若前海改革成功，未來它將與香港相輔相成，但不認同市場陰謀論指中央以前海取代香港，因香港很多方面都獲得優勢。