Fundman睇市：蘋果失勢 瑞聲閉翳

近期港股升又升得唔多，跌又唔肯跌的納悶局面，恐怕股民們已經開始習慣，尋日大孖沙見施政報告對壓抑樓市狂態藥力有限，午市開始出力掃本地地產股及騰訊（00700），埋單恒指跌得24點，報23,356點，值得關注空軍靜靜起革命，沽空佔成交比例連升三日，去到9.1%，是一個月以來第二高紀錄，睇嚟好友要顯出更大決心，大市先有機會更上一層樓。

特首施政報告成為全城焦點，簡單講招數包括加快樓花預售、未來三至四年提供6.7萬個新居屋單位，未來五年新增10萬公屋。簡化樓花預售程序，變相透過提早賣樓，透支供應數字，措施或令市民安心一點，可是近期將軍澳新樓盤入場費高達1,200至1,600萬，私樓樓價與市民購買力愈走愈遠是事實，再者地產商並非開善堂，賣長期樓花唔等於會平，對壓抑樓價作用應該有限。

無殼族上樓有排等

公營房屋方面，筆者一向唔信居屋能解決中產上車困局，主要係定價始終跟私樓掛勾，要買唔容易，除非政府明言居屋呎價定出上限，不過咁做隨時連細價私樓市場都拖冧，代價好大。本來最實際係增加公屋供應，至少無殼族能夠有瓦遮頭，細看原來包括每年要「回收」七千間濫用公屋，實際增加數字唔多，廿萬排緊隊上樓的，睇怕都要繼續做住長頸鹿。

前晚，彰顯美國國力的科技股龍頭蘋果公司（Apple Inc.），股價跌至485美元的大半年低位，自去年九月在705美元見頂後，一季多時間跌掉三成一，市值蒸發2,065億美元。

睇見份報告，分析員認為現時是最難評定蘋果前途的一刻，主要由於九七年Steve Jobs重掌蘋果後，每推出一項新產品，都做到風靡全球用家，一路順風順水，直到近期iPhone5銷情熱度稍減，結果被韓國三星奪去最暢銷智能手機一哥之位，蘋果要打逆境波，令市場有點擔心。

教主臨終前出版的回憶錄，講過蘋果應該不惜一切，耗用所有資源摧毀Google開發的手機軟件平台Android。時至今日，三星坐大、OEM及ODM智能手機百花齊放、Nokia斯人獨憔悴，完全都係拜這套手機軟件滲透率與日俱增所賜。

蘋果未能殺敵於微時，近日Android市佔率已經超越蘋果IOS，不少投資者對飲蘋果奶水的相關零部件供應商都開始失去耐性，富士康（02038）、瑞聲（02018）暫時都係小心為上。至於蘋果失勢對於那類股份有利？勉強想到內地兩間Android手機生產商中興（00763）以及聯想（00992），可惜兩者的手機生產收入佔比有限，要同蘋果的跌勢做對沖，難些少。最後一提下周三（二十三日）蘋果出季度業績，果迷及揸了相關股份的投資者不妨留意。