股海實戰：天能動力 升浪再起

尋日施政報告出爐，魚缸平淡看待，恒指全日波幅唔夠200點。屈指一算，恒指喺23,000至23,500點水平徘徊已超過十個交易日，經驗告知呢種「微波市」唔會行太耐，後市會唔會好似本月初咁大步越關，上試24,000點，之後再回試22,500水平支持，即係話先殺熊再屠牛，唔係冇可能。

一月初阿莊曾推介騰訊（00700），指呢個升浪之中其表現滯後，加上盛傳年內公司將獲發虛擬電訊營運牌照，股價遲早會急起直追。言猶在耳，尋日騰訊股價曾高見268.8元，收報267.2元，升3.4%。近日中國互聯網絡中心發布嘅《中國互聯網絡發展狀況統計報告》顯示，截至去年底內地網民規模達到5.64億，其中74.5%係手機網民，即係話為數達4.2億，年增長率達18%。顯然，喺智能手機普及化以及資費平民化之下，移動互聯網市場發展潛力巨大。若然能成功涉足流動電訊市場，騰訊可以話如虎添翼，故維持首季目標突破五十二周高位281元，支持位上移至255元。

中國製藥走勢對辦

回說組合，持有嘅光大國際（00257）周一急升後進行整固，唔多跌得落，會多坐一會。尋日提及嘅中國製藥（01093）對辦，遂以均價2.75元買入。此外，正在密切留意電池股表現。周初超威動力（00951）遭聯想控股旗下基金配售舊股，呢兩日都力守配股價3.9元之上，相信待消化基金股東減持消息後，股價可重拾升途，向上升穿配股前高位4.3元，可向波幅區頂部4.5元推進，重要支持喺3.7元水平。

其實講價位，理士（00842）會較啱炒家胃口，上周見高位1.6元後進行整固，短線確認重上250日線1.47元嘅話，有望再試上周高位。不過，論實力，阿莊都係鍾意隻天能動力（00819），其研發嘅鋰電圓柱形產品，最近便成為內地首家通過BATSO（Battery Safety Organisation）認證嘅動力鋰電池品牌。喺中國能源局研究院發布嘅一二年全球新能源企業五百強排行榜中，天能嘅排名按年上升10位至37位。另外，上月公司獲大股東入場增持。

橫睇豎睇，若然要買電池股，天能可視為實力之選。走勢上，天能股價仍處於去年以來嘅上升通道內，依照一浪高於一浪嘅走勢推斷，突破五十二周高位5.52元，可向6元大關推進，支持位喺4.8至5元區域。