樓市出更：舖租失勢 愈嗌愈縮

近幾個月內地豪客喺香港嘅消費力勁縮水，加埋零售核心區舖租見頂，唔少商戶出手都審慎咗；有代理話，近排尖沙咀、中環同銅鑼灣嘅舖位租金升幅，只係有約16至27%，同舊年初一線街舖租金升幅差唔多一倍比較，依家增幅明顯大不如前。舖壇資深投資者黃海明（Michael）都話，估計今年零售區舖租升幅將罕有地兩成都無。

有代理同劉Sir講，舊年年中，資深投資者黎永滔嘅銅鑼灣利園山道29至30號一個地舖，現有租客連鎖金行以每月約220萬元續租，呎租達約3,142元，同之前租金比較勁升超過兩倍。

金馬倫道僅加租16%

不過，時移世易，自從舊年中開始，內地豪客來港少咗掃高價鐘錶同金飾，轉為買啲化妝品等平價貨，加上代理普遍認為，依家一線街舖租金見頂，業主都願意調低意向租金誘客。

近月一線街舖租金升幅少過兩成一啲都唔出奇，有代理話，尖沙咀金馬倫道58至60號地下部分，面積差唔多2,300方呎，啱啱畀間飲食店以每月約29萬元租咗，較之前月租只係多4萬元，增幅僅16%。

另中環士丹頓街雙號地下及一樓，面積各約800及760方呎，有間經營酒窖商戶每月近12萬元租用，較之前租金只升約18%。

核心舖漲幅唔夠3成

至於地舖呎租榮升為全球最貴的銅鑼灣區，唔係條條街地舖都唔憂租，聽講銅鑼灣謝斐道440至446號地下部分，面積約3,500方呎，啱啱畀間餐飲集團每月約23萬元租咗，較前租只升約21%。

此外，銅鑼灣區駱克道雙號地舖，面積約1,000方呎，現租客時裝店以每月約38萬元續租，較前租只增近27%。

Michael話，近幾年一線街地舖租金大升，有啲租金升幅超出市場可承受水平，相信商戶喺核心區承租舖位時會特別審慎，唔會搶貴租。

而高緯環球香港商舖部高級董事胡詠詩亦話，近月商戶洽租零售核心區地舖的步伐已轉慢，相信今年一線街舖租金升幅將明顯收窄。