股海實戰：中國製藥 估值提升

施政報告發表前夕，港股繼續反覆偏軟，恒指低開24點後，一度反彈至全日高位23,515點，創自一一年六月初以來新高後又再回軟，曾倒跌百點，收報23,381點，跌31點，成交754億元。連續兩日衝高回落，加上成交減少，進一步確認大市上升力度轉弱。再睇板塊表現，早前熱炒嘅光伏股及油氣服務股個別有翻炒迹象，但人氣大不如前，提防完成後抽後會再度下試支持位。

事實上，近期熱錢流入速度明顯放慢，相信農曆新年前，一次較大嘅調整在所難免。尋日阿莊話，每次翻提「港股直通車」就離頂不遠，希望唔好開口中！

中遠績差只宜短炒

市場炒家主攻AH溢價收窄概念，洛鉬（03993）、洛玻（01108）、天津創環（01065）、山東墨龍（00568）都逆市高收。講到AH股，雖然中國遠洋（01919）H股由去年末季低位2.75元回升至上周五高位見4.84元，但航運業不景氣，公司去年成績表極可能見紅，屆時將連續兩個財政年度錄得虧損，即係話其A股可能要戴上「ST」帽子，成為A股有史以來「最大規模」嘅一隻ST股。暫觀航運業回春可能在明年，相信今年其股價維持上落格局。績差H股短炒波幅冇妨，但大手買入博翻身，似乎仲未係時候。

繼續睇啲同指數表現冇大關係嘅中資股，中國製藥（01093）上周股價突破2.5元水平阻力位及前年末季以來嘅橫行通道頂部，尋日收報2.71元，升0.3%，成交1,920萬元。為減少對原料藥及中間體產品嘅依賴，去年十月公司已完成向母公司收購高端成藥資產，涉及代價89.8億元，以發行代價股份及可換股債券支付，雖然對每股盈利造成攤薄效應，但勝在唔使攞現金買嘢，而新收購項目與其現有嘅成藥業務又具有協同效益，相信嚟緊成藥業務佔公司收益比重會明顯提升。

鑑於公司新收購嘅成藥業務主打高血壓及中風等病患，產品喺內地市佔率高且需求大，盈利前景可看高一線。更重要嘅係，經過今次注資，公司已由過去營收極受原材料藥價格波動影響，變成一隻具增長潛力嘅成藥股，嚟緊有望喺醫藥板塊中由「力衰老將」變成「活力新星」，現價尚未充分反映上升潛力，建議逢低收集。