樓市出更：家族廿億煲加連威老道

銀行息口多年來無咩升過，查實揸磚頭好過揸銀紙，唔少大孖沙都深明此道。其中，賭王傅老榕家族成員或有關人士响過去兩、三年，喺尖沙咀加連威老道密密手掃咗4項商用物業，購入價加埋逾二十億，反映佢哋家族睇好呢條街後市，其中舊年底買嘅同順興商業中心全幢商廈，就會諗住翻新成為銀座式商廈。

雖然近幾年尖沙咀街舖焦點落咗喺廣東道，不過，加連威老道依然有佢嘅魅力，所以傅老榕家族成員或有關人士呢幾年先後買入4項商用物業，購入價加埋有成20.46億元。該家族有關人士旗下嘅瑞生控股國際行政總裁李泓毅（Taylor）同劉Sir講，公司喺尖沙咀加連威老道及廣東道都有物業，全部都係長揸。

同順興計劃全幢翻新

Taylor話，其中同順興商業中心依家樓上單位都幾舊，所以會翻新全幢做銀座式商廈。至於加連威老道31及31A號一幢舊樓會斥8,000多萬元重建做一幢商用物業，諗住起大約16層高，總樓面約3萬多方呎。

而早前放租嘅加連威老道46至48號巨舖，分間後租咗20個舖，平均呎租約200元。另據悉，佢哋公司响加連威老道34至36號gi商場，依家地舖大部分樓面畀連鎖服裝店租咗。

觀塘摸貨半年袋609萬

近幾年東九龍有唔少新進投資者，其中，有「電訊王子」之稱嘅投資者羅珠雄，佢同劉Sir講，依家區內工廈樓價升咗約1倍，所以今年買嘢會審慎啲。億京發展項目策劃黎裕宗，同埋第一集團董事霍偉良都話，希望施政報告中會增加多啲唔同類型及面積嘅地皮。

拆售風潮席捲工廈市場，第一太平戴維斯劉基忠話，尖東廣場羅守輝拆售荃灣海盛路3號5至8樓工廈樓花，其中7樓共19個單位中，已賣10個，平均呎價約4,300元。另美聯工商黎紹賢話，觀塘天星中心連錄兩宗工廈樓花摸售，其中一低層全層以約3,525萬元摸出，原業主半年帳面袋609萬元。

另市傳灣仔海外信託銀行大廈高層兩全層以約2億元售，呎價1.4萬元 創該廈新高，原業主四年前購入帳面賺逾1.3億元，賺幅逾2倍。中原何德成話，尖東新文華中心B座8樓劏成21個單位賣，並有兩年4厘租金回報保證。