牛熊對壘：樓市信心回復 吼恒地20667

大市表面平靜，內裏洶湧。恒指昨日波幅唔夠100點，埋單升107點，有過百隻股票創新高，47隻股份收市升幅一成或以上，本地券商、光伏新能源股齊齊大升。

不過，主板成交回落至754億元，即月期指高水12點，就算短線大幅調整機會唔高，要一下子急升又似乎無乜消息。

昨日有13隻牛證被劏，另有19隻熊證被收回，幾乎都係新上市牛熊證。現時，睇好後市的人佔多，就算唔睇好，都唔會大手做淡，前日股市輕微調整，牛熊證街貨即見真章，當日恒指牛證總街貨增加7億份，總數升至54.23億份，熊證街貨減少6.83億份至18.96億份。牛證重貨區介乎22,200至22,699點之間，涉及接近27億份街貨，熊證重貨處於23,400至23,899點，街貨約10億份。

內地電訊業暗起革命，工信部在其官方網站公布，已起草《移動通信轉售業務試點方案》，目標是鼓勵、支持和引導民間資本進入電訊業，消息利好一眾電訊相關股，本身具壟斷地位的幾隻電訊服務股如中移（00941）就可能有影響。

中移窩輪交投活躍

中移上周衝上90元之上後腳仔軟，昨日無升跌，相關窩輪卻十分活躍，錄得10.7億元成交，僅次於恒指的第二大成交窩輪，其好倉街貨前日增加7,000多萬份。

整體窩輪昨日成交按日升1.4%至92.74億元，恒指輪比例由前日的三成以上降至29.3%。牛熊證成交跌3.6%至53.64億元，牛熊證比例是55:45。

本地地產股昨日表現唔差，有市場中人認為，政府辣招盡出，樓市經過一輪消化後，需求不減，近日又見高價承接的交易，正如大孖沙所言，今年樓價唔會大升，又唔會大跌，而地產股則受惠市場信心回復，折讓收窄將會繼續，不妨留意資產值折讓有番咁上下的恒基地產（00012），昨升2.6%，報59.1元。恒地法巴購（20667）今年七月三日到期，行使價62元，實際槓桿7倍。