股海實戰：金風 具備翻炒條件

呢頭仲腳震震，嗰頭又見個市上番去，惟有按原定計劃，避開重磅股，繼續短炒細價股。尋日光伏股又再飆升，昔日「散戶最痛」嘅保利協鑫（03800）股價重上2元樓上，收2.04元，升8.5%，卡姆丹克（00712）仲誇張，呢個月累升逾六成！阿莊持有嘅興業（00750）終於完成震倉，尋日升穿7.22元，收報7.27元，升9.82%。

不過，一如阿莊所講，內地開始高掛「反貪大旗」，尋日傳來中紀委監察部高調通報去年查辦案件情況，並提倡各界實名舉報，內地魚缸政治風險不可不察。總而言之，都係要量力而為。

光伏股受惠國策傾斜

光伏股升勢持續，除咗因為國策傾斜、股神加注光伏產業等利好消息外，亦受惠近期光伏產品需求增加，價格回升，其炒作理念不離「博翻身」三個字。與光伏股類似，風電股亦已過咗兩年低潮，近期人氣升溫，尋日大唐新能源（01798）、華能新能源（00958）、中電新能源（00735）、中傳動（00658）及龍源電力（00916）升幅介乎7至17%不等。有智慧不如趁勢，可以𥄫實金風科技（02208）。

論低殘股，金風可謂當之無愧，皆因其一○年十月上市，招股價17.98元，當月見高位21.8元後，便進入漫長跌浪，去年八月初見低位2.41元，累跌幅度近九成，高位持貨唔識走真係一殼眼淚！去年十月下旬公布公司去年首九個月純利同比跌93%，至3,851萬元人仔，但見股價未有再跌穿八月低位，尋日收市報3.97元，升幅7.3%，成交3,605萬元。

最近新能源有「回春」迹象，若然真係唔「殘」唔炒，金風絕對具備翻炒嘅條件！其實，雖然去年第三季金風嘅盈利尚未見有大改善，但首三季經營活動現金流量淨支出額同比減少1.18倍，反映期內消化庫存，且籌資活動產生嘅現金流量淨支出額同比增加1.36倍，原因係公司歸還咗大量銀行借款。此外，去年第二及第三季，其毛利率維持喺16.5%嘅健康水平，且看今年業務表現能否否極泰來。針對近日股價走勢，一直沿10日線向上，上周突破了10日及250日線，而10日線又重越250日線，技術指標向好，若板塊人氣保持旺盛，短炒目標睇4.5元，10日線支持喺3.58元。