股海實戰：中生製藥 升勢未盡

尋日中資電訊及內銀股抖氣，輪到本地地產股接力，恒指僅微跌1點作結，收23,329點。今年三月內地會舉行政府換屆後首個兩會，情況比較特別，此前後政治風險因素或會再度上升，所以炒家都係抱着農曆新年前盡力炒，之後就要抖抖嘅心態，呢個月一於狂炒一轉過肥年！

昔日散戶同基金愛股如國美（00493）、保利協鑫（03800）、雨潤（01068）股價繼續浸浸上，就連之前是非多多嘅霸王（01338）同味千（00538）都分別升7%及5%。開始有資金專吼大折讓股，建築股有異動，新昌（00404）急升12%、力寶華潤（00156）升6%、香港建設（00190）升7%。若然想押注兩地大興土木、帶動建築業回春，想搵冷敲對象可以睇吓萬順昌（01001）、俊和（00711）同高力（01118）等。

滬杭甬睇位食胡

組合方面，揸住嘅滬杭甬（00576）尋日高位見6.6元，相信快見目標價6.8至7元，呢個禮拜會睇情況食胡；至於隻信義玻璃（00868）上過5.62元就掉頭並低收作結，短線突破唔到5.6元會睇位落車。

提到醫藥股，時值流感高峰期，要翻炒醫藥板塊實在唔難搵藉口，咁啱尋日傳來國務院確立生物產業為戰略性新興產業，下發嘅產業規劃提出，到一五年產業增加值佔GDP比重會較一○年翻一番，到二○年將成為國民經濟支柱產業嘅目標。生物產業包括生物相關嘅醫藥、農業、能源及製造等，難得有利好國策消息支持，難怪尋日醫藥板塊有睇頭！

論業務模式，中生製藥（01177）可以視為生物醫藥類股嘅首選之列。該公司主要透過應用先進嘅中藥現代化技術和生物技術，研發及產銷多種促進人類健康嘅生物藥品、中藥現代製劑及化學藥品，且已策略性地透過位於湖南嘅正大邵陽骨傷科醫藥拓展醫療及醫院業務，已建立完善嘅產業鍊。

截至去年九月底止首三季，公司營業額同比增長41%至61億元，盈利6.27億元，增長1.2倍，現價預測市盈率約廿倍，估值仍具上調空間。走勢方面，去年十一月中旬以來股價至今已累升逾三成，尋日收報3.97元，短線回吐守穩3.7元樓上，有望繼續反覆向上，中線目標睇4.5元。