樓市出更：23個準樓花盤萬二伙等批售9年最多

政府增住宅供應漸見成效，根據最新數字，截至上月底待批住宅預售樓花同意書共有23份，涉及單位有成12,009伙，按月再多1,761伙，待批單位超過八成會喺明年落成，仲創埋○四年三月後新高，期內新申請項目包括長實（00001）將軍澳日出康城三期，提供1,648伙，單位量係待批項目中最多。

劉Sir睇番地政總署截至上月底最新數字，依家總共有23個住宅項目等批預售文件，涉及單位多達12,009伙，數字已經連續三個月超過1萬伙。

日出康城提供1648伙

待批單位量仲係○四年三月後，接近九年最多，而且當中16個住宅項目總共9,737個單位預計出年可以落成，劉Sir睇嚟未來供應都OK喎。

講番今次新入紙申請預售文件嘅兩個項目，包括有長實將軍澳日出康城三期鐵路上蓋項目，提供1,648個住宅單位，預計出年十一月二十日落成，劉Sir仲八到，發展商計劃喺今年上半年推出發售。

相對上述將軍澳日出康城三期，另一個新增申請就真係相當「袖珍」，呢個信置（00083）喺一○年投得嘅市建局大角咀福全街及杉樹街交界重建項目，只係提供113個單位，估計出年七月三十一日可以落成。

麥花臣匯趕春節後推

另九龍建業（00034）亦將旺角奶路臣街38號命名為麥花臣匯，呢個項目提供293個單位。九龍建業市務及銷售部總經理楊聰永同劉Sir講，項目待批預售文件，預計春節後推出市場。而旗下大角咀奧城．西岸示範單位接近完成，完工後希望可推出。至於日內開售嘅新地（00016）將軍澳天晉II，亦喺上月再次獲批預售文件，提供單位784伙，相比舊年七月上一次批出嘅782伙多出2伙。