魚缸Blogger：新城發展 可以冷敲

去年十一月先至上市嘅新城發展（01030），雖然曾經跌穿過1.45元招股價，但尋日喺成交激增下，即市一度抽升近9%，高見1.62元，創上市新高，埋單仍升6.7%，收報1.59元，美銀美林畀佢目標價1.8元，暴炒妹就唔大貪，先睇1.7元。

新城發展主要喺長三角從事住宅物業同多用途綜合項目開發，截至去年八月三十一日止，公司土地儲備高達1,370萬平方米，不過搶地行動無停過，如十一月以約3.4億元人仔奪得上海寶山區地皮，發展聯排、洋房及高層公寓，而去年首十一個月，公司實現合約銷售金額145億元人仔，已多過一一年全年。至於美林亦出報告首次叫人買，話佢○九至一一年嘅合約銷售同相關純利複合年增長率分別為28%及54%，料一二至一四年相關純利分別為8.7億、16.56億及20.35億元人仔，盈利增長強勁兼估值吸引，可以冷敲。

新城發展（01030）

阻力位：1.70元

支持位：1.49元