Fundman睇市：鋼鐵股 炒復甦醒概念

美國大步檻過，避免墮崖，港股開市後自動波愈升愈有。搵外資行老友問，佢話唔少buy side芬佬放緊假未開爐，難怪期指裂口開高後沿途阻力唔大，仲愈挾愈誇張，開市價22,852點，已經唔算好低，誰不知仲可以即市推多470點，見最高23,322點，直到收市前半小時，好友先至鳴金收兵，似乎係對未來兩日更多芬佬陸續歸位，開始減磅獲利鋪路。

美國一○年推QE2，將恒指推到24,988點海嘯後新高，之後大半年，港股只能在22,123至24,468點之間橫行，三頂派貨後，借歐債危機，於一一年十月跌至16,170點中期低位。今次大市高地重遊，尋日首次升至高位蟹貨區中軸23,295點樓上。展望短期資金持續流入港元區，更重要是內地經濟及A股轉角市已確認於去年第四季出現，今年上半年抵達兩萬五點目標的機會唔細。不過，去年恒指累積兩成二升幅，超出唔少投行預測，全賴一線重磅藍籌帶動，隨着這類股份估值與二三線股拉闊，相信上半年好大機會是細價股及中型股的天下。

國統局公布十二月中國製造業採購經理指數（PMI）見50.6，連續三個月高於50盛衰分界，滙豐十二月PMI終值也創十九個月高位，見51.5，在在顯示無論是大型國企還是中小型民企，對短期經濟展望也頗為樂觀。

另一個較少提的數據，是十二月內地鋼鐵行業PMI，按月大升6.3個百分點，見55.5%；主要反映訂單需求的新訂單指數，更誇張抽升13.5個百分點，見60%，兩個數字分別創七及二十二個月新高。有分析員認為當中除季節性因素影響外，內地鋼材市場經歷近兩年慘淡市況，在今年基建投資增加、鋼材價格低位反彈的預期下，需求明顯增加，馬鋼（00323）及鞍鋼（00347）目前市帳率分別為0.58及0.73倍，與鋼鐵股周期開始復甦時的0.8至0.9倍仍有距離，短期內火鳳凰故事，值得繼續捧場。

富士康有條件再升

電訊設備股去年大落後，但尋日中興（00763）成交及股價均見明顯突破，升穿十月高位13.5元，收13.94元，升0.88元，確認擺脫一浪低於一浪的中期調整。

去年內地電訊設備股被忽視，一來幾間電訊商3G固定投資過了高峰期，其次係歐洲及中東訂單未達預期所致。富士康（02038）去年一連串產能重整、削減存貨等一次性因素，導致上市以來首次錄得負毛利率（1.5%），去年中期勁蝕2.26億美元，唔少大行對下半年大逆轉抱觀望態度。不過銀紙唔識呃人，去年十一月由2.73元抽升至4.2元的七個月高位後，一直以橫行代替調整，擺出跌唔落姿態。

富士康現價一三年市帳率1倍左右，假如最壞情況在上半年過咗，亦應有博反彈條件，尤其綜合預測其一二年蝕2.05億美元，分析員估計下半年只賺2,700萬美元，預測咁保守，按目前的形勢，再向上炒多浸等三月底業績揭盅的機會唔細。