股海實戰：信義玻璃搶閘落注

二○一三年港股紅盤高開，咁啱中午美國眾議院通過法案，暫免國家財政「墜崖」，大戶乘機挾淡倉，恒指全日最多升660點，高位見23,317點，收報23,311點，升655點，成交達825億元，股民個個眉開眼笑！

阿莊話唔贏唔走嘅港交所（00388）終於起步，尋日高位見142元，收報141.9元，升7.5%，突破五十二周高位148.9元指日可待。光伏股興業太陽能（00750）升逾半成，收報6.96元，呢啲股一係唔行，一行就一蚊一蚊咁上，一於繼續揸。

組合中嘅中旅（00308）就真係抵打，揸咗咁多日都唔肯行，再唔行要睇位落車。反而上周五推介嘅中信泰富（00267）就係威係勢，連現三支大棍，成交放量，可惜未及上車，好在尋日追番見報推介嘅恒大（03333）50,000股，短炒落車見機行事，回吐宜守4.2元。

通達留意上車機會

若然想將部分獲利資金部署細價股，阿莊認為通達（00698）、有利（00406）同文化中國（01060）都可以密切留意。

通達獲基金入股，呢幾日股價蠢蠢欲動，可以留意搭順風車機會；有利就一副慢火煎魚格，估值仍然低迷，唔好走寶；至於文化中國，純博炒賀歲片登場，留意過年前有冇動靜。

阿莊認為，今年魚缸一大特色係熱錢氾濫，特別要注意日本採取極度寬鬆嘅貨幣政策，會否令日圓再度成為「套息交易」（Carry trade）嘅主角。依照過去市場熱錢充斥嘅時候，游資會喺商品市場搵食，並從而帶動商品股股價狂飆，實行雙邊落注，故又係時候留意吓商品類股份嘅部署。

玻璃股信義玻璃（00868）近兩個月股價升幅溫和，尋日以大成交突破5元大關，收報5.24元，升9.6%。咁啱摩通就信義發表報告，指其今年可受惠建築用浮法玻璃需求回升，故將其目標價由5.1元調高至5.9元，反映大行看法正面。

事實上，根據往績，內地玻璃價格約三至四年為一個周期，二○○○年以來經歷咗四個上升周期（即○○、○三、○七同一○年），換言之，今年將會係新上升周期嘅開始，新年伊始着手布置有一定勝算，短線回吐守穩5至5.1元區域可先落首注。